Coach ṭha ber Pep Guardiola

Football khawvela coach ṭha sawi a nih apiangin tlar hma lamah Pep Guardiola hming dah a ni zel tawh ang - City tana treble nomawi chawitu hi coach ṭha ber atan thlan a ni a, Serie A-a Napoli champion puitu Luciano Spalletti leh Inter Milan boss Simone Inzaghi a khum.

Guardiola chuan, "Kum riat chhung zet an hnathawh tawh avangin ka player-te hnenah lawmthu ka sawi a, he zinkawng ngaihnawm tak kan zawh ho avang hian ka lawm a ni," a ti a, coach ṭha bera thlan a nih chhan chu City-a a player-te vang a nih thu a sawi.

Kum 52 mi Pep hian Barcelona kha treble champion a lo nihpui tawh bawk a, a sulhnu hi uanpui tham ni mah se, inngaitlawm takin a player-te inpekna fak a thlang ta zawk.

Mahse, City-a a player pawimawh Ruben Dias chuan Pep hi fakin, "A thawkrim em em a, a tawpah chuan midang tana tih ve theih rual lohin football a khelhtir thei ang che - a thawhrimna leh beih hram hramna hmangin keimahnia a ṭha ber ṭheuh pe turin min cho chhuak ṭhin.

"Coach hi mize hrang hrang an awm ve a, chung zinga i duh ber chu i ṭhat dan ber khelhtir theitu che a ni ngei ang," a ti a, Manchester City lama a pu chu a fak thiam hle.

Spanish coach hi Messi chuan pakhatnaah dah vein, pahnihnaah Simone Inzaghi a dah a, La Liga-a Barcelona champion puitu Xavi chu pathumnaah a dah thung.

India captain Sunil Chhetri chuan pakhatnaah Pep dahin, pahnihnaah Tottenham Hotspur boss Ange Postecoglou a dah teh tlat a, pathumnaah kum 33 hnua Serie A-a Napoli champion puitu Luciano Spalletti a dah.

Blue Tigers coach Igor Stimac chuan Pep Guardiola ṭha a ti ber a, a dawtah Luciano Spalletti leh Simone Inzaghi a dah - Inzaghi hian season hmasa khan Inter Milan chu Coppa Italia-ah champion puiin, Champions League final a hruai thleng bawk.

Pep hian point 28 hmuin a chung ber a luah a, pahnihnaah Spalletti (18 points) a awm a, pathumna chu Inzaghi (11) a ni.