Jose Mourinho an ban

AS Roma chuan an manager ṭang lai Jose Mourinho chu an ban. Portuguese manager hian a team hi Italian football inelna sang ber Serie A-ah pakuana dinhmun a luahpui mek.

Kum 60 mi Mourinho hian kum 2021 May thla aṭang khan Roma hi a enkawl ṭan a, a kum hnihnaah Europa Conference League nomawi chawipuiin, season hmasa khan Europa League final a hruai thleng bawk a ni.

Mahse, kuminah Champions League an khel phak lo a, league an khelh ṭhat tawk loh bakah kar hmasa mai khan Coppa Italia aṭangin Lazio hneh loin an tla, an league match hnuhnung berah AC Milan an ngam lo - Milan an hneh loh ṭum erawh chuan Mourinho hi hrem vangin a inlan lo thung.

AS Roma neitu Dan leh Ryan Friedkin te chuan thuchhuah siamin, "Roma tana a hnathawh leh thil tihte hi kan hre reng tawh ang. Mahse, tunah chuan danglamna siam hi club-in a mamawh leh kan tihmakmawh chu a ni bawk si.

"Jose leh a thawhpui zawng zawngte hi an kal zelna turah duhsakna kan hlan," tiin an manager an thlah thu an sawi, kumin June thla tawp ruala a contract zo tur chu a hun hmain an titawp ta a ni.

Roma hian Serie A match an khelh hnuhnung parukah vawi khat chiah hnehna an chang a, league hmahruai mektu Inter Milan an phak lohna chu point 22 ngawt a nih tawh avangin an dinhmun hi a ṭha lo.

Chelsea, Manchester United, Real Madrid, Inter Milan leh Tottenham Hotspur te pawh lo enkawl tawh Mourinho hmunruak luah tur hi an la puang lo. Roma hian tun kartawp Inrinni zanah table mawngphah lam talbuai lai Verona an hmachhawn dawn a ni.