Nilaini zan Indian Super League inkhelah Bengaluru chuan 3-0 in Chennaiyin an hneh a, semifinal khel turin beiseina an nei thar ve leh ta.
Bengaluru tan Udanta Singh chuan goal hnih a khung a, Iman Basafa chuan penalty aṭangin goal khat a khung bawk. Chennaiyin lamin a chhanletna tur an nei lo a; 3-0 in an tlawm.
Season bul ṭan ṭha lo Bengaluru hi an league match hnuhnung pasarihah an tlawm miah lo a, palina Mumbai City chu match khat khel tam chungin point khat chiahin an phak tawh lo.
Team 11 inelnaa pakuana FC Goa thlengin top four-a inhlankai beiseina a la awm a, NorthEast United leh East Bengal tan erawh thilmak a thlen a ngai tawh ang.
Hei le Bengaluru
Chennaiyin nena an intawn hmasakah 4-2 in Bengaluru an lo chak tawh a, an vawi hnih intawnnaah pawh Chennai club hi an ngam hle - Basafa chuan minute nga pawh a liam hmain goal khungna chance a nei nghal a, mahse, tawnhriat nei ṭha keeper Debjit Majumder a paltlang thei lo.
Chennaiyin tan Lukasz Gikiewicz chuan Parag Shrivas tihsual zarzoin goal khungna remchang a nei ve bawk a, mahse, goal-ah a chantir thei bik lo. Minute 12-na lekah hrem an ni zui nghal.
Edwin Vanspaul chuan box chhungah Sunil Chhetri a ti tlu a, Iran tana vawi 28 inlana goal 13 khung thei defensive midfielder Basafa chuan harsatna nei loin goal-ah a chantir.
Chennaiyin tan Hungarian forward Vladimir Koman chuan si phurh sutna remchang nei mah sea chhawr thei lo a, a hnu lawkah Udanta Singh chuan Bangalore club goal hnihna a khung zui.
Tlangval vanduai Lianzuala!
Second half-ah pawh Bengaluru bawkin inkhel an thunun a, Slavko Djamkovic tihsual zarzoin Udanta chuan minute 52-naah a goal hnihna a khung zui - minute 60 pawh a tlin hmain 3-0 a ni der!
Chennaiyin coach Božidar Bandovic-a'n goal khung a mamawh tih hriain Mizo defender Jerry Lalrinzuala chu minute 74-naah a la chhuak a, a hmun ruakah Lallianzuala Chhangte a luhtir.
Lunglei forward Lianzuala hian chance duhawm a nei zui a, mahse, Bengaluru keeper Lara Sharma a paltlang zo lo. Minute 83-naah penalty a beisei bawk a, mahse, referee-in ngaihdan dang a neih avangin Mizo tlangvalin penalty a hlawh chhuak lo.
Lianzuala vanneih zan a ni lo a, hun tawp thlengin goal dang a lut lo a, Chennaiyin an tlawm - Chennai club tan hian top four beisei erawh a la bo lo a, palina Mumbai City nen an point hmuh zat a inang a, match khatin an khel tam thung.
Captain Fantastic
Chhetri-a'n tun season-ah beisei angin hun a hmang lo a, Chennaiyin an hmachhawn hmaa FC Goa nen 1-1 a an inhnehtawk ṭumin ISL-a goal khung tam ber Coro-a siam (48 goals) chu a nih rual.
Captain Fantastic hming lem an pek striker hian Chennaiyin lakah record thar siamna chance a nei. Mahse, a penalty hlawhchhuah chu pet duh loin Basafa a kian.
Hei chauh hi a ni lo - Chennaiyin defender rual a bum kual hnuah awlsam takin pet goal thei mah se Udanta a kian a, Manipur forward hian India captain duhsakna hi goal-ah chantirin hming chher nan a hmang.
Kum 37 mi Chhetri hian tun season-ah mak takin goal khat chiah a la khung a, goal khung tam ber record thar erawh a la siam ngei tura ngaih a ni - Bengaluru tan hian Edmund Lalrindika chu bench aṭanga luhtir a ni.
