Final-ah Barty leh Collins

A inthifim zel a, tunah chuan a thiam pahnih chauh an dam ta. Ashleigh Barty leh Danielle Collins ten Australian Open 2022 hmeichhe singles final an khel dawn, champion thar kan hmu ngei dawn.

Melbourne Park-ah nimin khan semifinal match hnih khelh niin, a hmasa zawkah world number 1 leh seeded pakhatna ni bawk Barty hian Madison Keys chu 6-1, 6-3 a hnehin final a lut, an ramah a vawi khat nan Grand Slam final a khel ang.

Inkhel hnuhnung zawkah kum 28 mi Collins chuan, darkar khat leh minute 18 chhungin Iga Swiatek chu 6-4, 6-1 in a hneh. American nula hian a vawi khat nan Grand Slam final a khel tawh, nomawi a inchuh pui tur Barty erawhin major title pahnih a nei tawh.

A awlsam
Semifinal meuh a ni tawh a, mahse seeded pakhatna Barty tan hna harsa a la awm lo. Darkar khat leh minute hnih chhung lekin Madison Keys a hneh thei, a tir aṭanga a tawp thlengin harsatna a tawk miah lo.

Wimbledon champion hian a khingpui service a chhuhsak nghal a, inkhel a thunun hneh em avangin Rod Laver Arena-a amah ṭantu kalkhawm tan hlauhthawnna tur a awm lo - kum 42 hnuah Australian nula zinga final lut leh thei hmasa ber a ni.

Kum 1978 khan Christine O'Neil a champion, a hnu lamah tualchhung nula champion thei an la awm leh lo. Hun rei tak hnuah Barry hian an ram mipui lawmna siam leh theihna remchang a nei, mellung pawimawh phun turin match khat chak chauh a hmabak ta.

Dan theih loh Barty
Australian Open 2022 khelh tawh china player che ṭha ber thlang dawn ila, hmeichhe world number 1 Ashleigh Barty aia thlan tur dang an awm chuang lo ang. Australian nula hian match ruk a khel tawh a,a khingpui apiang a la sawp vek.

Set a la hloh lo a ni saltiah lo, tie break khelh pui phak pawh a la tawng lo! A hma a ding apiang chu game hnih vel chauh lak tir chungin a vaw chhuak hmiah hmiah zel, nimin inkhwl bikah pawh a service a hloh miah lo.

Fourth round-a Amanda Anisimova nen an inkhelh ṭumin a service vawi khat a hloh, a bak chu a la hloh miah lo. A hma a ding leh tur tan pawh a phurawm teh chiam lo ang, tualchhung tennis ngainatuten a lakah beiseina a nei sang takzet.

Mangṭha Swiatek
French Open champion hlui Swiatek-i'n a service ṭha tawk lo a tuar, set khatna bikah pawh a khingpui service vawi hnih chhuhsak thei mah se, ṭum thum a hloh let avangin chesual tlem zawk Collins a chungnung.

Set hnihnaah pawh Swiatek bawkin service la hmasa leh mah se a hloh lehnghal. Rod Laver Arena-a Polish nula ṭantu ten au phur ṭhin mah se kum kum 20 mi Swiatek a che fuh hleithei lo; a vawi khat nana Grand Slam semifinal kheltu Collins a hriam zawk.

American player Collins hian tennis a khelh hun chhungin nomawi pahnih chauh a la chawi a, inelna lianah phei chuan French Open quarterfinal a khelh bak chu a la thleng sang ngai lo, tunah erawh Barty a hneh chuan major title a nei dawn.

Inkhel Thlirna Tawi
Barty Stats Keys
5 Aces 1
0 Double faults 1
28/46 1st serve in 41/58
24/28 Win 1st serve 20/41
12/18 Win 2nd serve 9/17
4/6 Break points won 0/2
6/10 Net points won 4/11
20 Winners 8
13 Unforced errors 24
65 Total points won 39