Monchi leh Lopetegui vangin Sevilla ka pan - Anthony Martial

Manchester United striker Anthony Martial chuan season tawp thlenga loan hmanga khel turin Sevilla a pan. Spanish club hian Martial hi lei theihna an nei tel lo a, Man United hnenah loan fee an pe lo a, mahse a hlawh an pe vek dawn.

Sevilla chuan French forward lak tum hian thla tam tak an lo beih tawh avangin Martial an lalut hi an lawm. Spanish clun chuan, "Kan club kum 132 tlin lawm nan kan fan-te tan thilpek hlu bik a ni," tiin thuchhuah an siam.

Martial chuan, "Se­villa-a ka loan hun hi thla nga chhung awh tur a ni a, season tawp thleng tur a ni. Amaherawhchu kan hmalam hun a sawi lawk theih loh. Sevilla ka zawm chhan hi Monchi leh Lopetegui te vang a ni a, helai hmuhah hian ka theihna lantir turin ka lo kal a ni," tiin media a hmachhawn hmasak berah a sawi.

Julen Lopetegui hi Sevilla manager a ni a, Spain leh Real Madrid te a enkawl tawh. Monchi hi Sevilla goalkeeper hlui a ni a, tunah hian Sevilla-ah sporting director hna a chelh mek.

Kum 26 mi Martial hian tun season Premier League match riat chiah a la khel a, goal khat chauh a la khung. French forward hian kum 2015 khan pound maktaduai 36-in Man United hi a zawm a, season paruk leh a chanve chhungin league match 175 khelin goal 56 a khung.

German manager Ralf Rangnick hnuaiah Martial-a'n khelhna hmun a chang tam lo a, La Liga club a pan chhan hi khelh tam a duh vang a ni. Sevilla hian February 5, Inrinni zan hian Osa­suna an hmachhawn dawn a, Martial hi a inlan theih beisei a ni. Julen Lopetegui hote hian La Liga match 22 khelhah point 46 an hmu a, pahnihnaah awmin hmahruaitu Real Madrid point li chauhin an pha lo.