Final lut tur an chingfel dawn

Tennis season khat chhunga Grand Slam hmasa ber Australian Open hmawr bawk a hnai, vawiin hian mipa singles final khel tur chinfel a ni dawn. Chawhma dar 9:00-ah semifinal hmasa khelh a ni dawn, chawhnu lamah Daniil Medvedev leh Stefanos Tsitsipas an intum zui ang.

Rafael Nadal hmaah Matteo Berrettini a ding dawn. Player pahnih hi tun hmain vawi khat chiah an la intawng, an inkhelh hmasak hi 2019 US Open kha niin Nadal a chak; tun ṭumah hian rinkai zawk a ni leh dawn.

Semifinal khel tur player pali zingah Nadal (2009) chauh hi Australian Open champion hlui a awm, player dang pathum tan chuan thil thar a ni dawn. Nadal a tlang lo a nih chuan Melbourne Park-ah champion thar kan hmu dawn tihna a ni ang.

Record thar a hnai
Grand Slam champion nih hi a awlsam lo, a harsat zia hrechiangtu chu tennis ngaina British mi khu an ni - Grand Slam vawi thum champion Andy Murray chu 'Sir' nihna an pe hial, hei hian major title lak awlsam loh zia a ti chiang.

Nadal chuan maw, nomawi lian hi 20 zet a chawi tawh asin! Thu dik a ni si, Nadal bakah Roger Federer leh Novak Djokovic te chuan Grand Slam nomawi 20 ṭheuh an nei tawh - Nadal tan a elpuite pahnih kalsan turin match hnih chak chiah a hmabak ta.

Kum 35 mi Nadal a la ṭawng fimkhur hle, "Ka hlimna ber chu nuamti taka tennis khelh theih a ni. Grand Slam nomawi chawi hnem ber nih vanga lawm vak tur ka ni hran lo. Amaherawhchu ka thei a nih phawt chuan a sang thei ang ber thlen ka tum," a ti.

Nadal hian January 27, Thawhlehni khan semifinal hautak takah Denis Shapovalov a hneh hram, set nga an khelh hnuah a vannei zawk a ni. Inkhelh bakah Nadal chuan, "Kum 21 mi ka ni tawh lo, semifinal khelh hma a ni hnih chawlh ka nei hi ka lawm," tiin a sawi.

Tennis hi a hautak a, an kum a tam deuh hnuah an zuai hma ṭhin. Nadal pawh hi tharum hmang nasa tia sawi ṭhin a ni. Mahse, player dang zawngte aiin tharum a nei rei niin a lang, kum 25 mi Berrettini tan pawh zuam sual theih tur tak a la ni.

Berrettini beiseina
Italy khu tennis ngaihsanna ram a ni a, inelna lian Grand Slam nei chiah lo mah se, inelna sang pahnihna ATP Masters 1000 an nei - Italian Open khu clay court inelna ngaihhlut berte zinga mi a ni phak; tunah tak phei chuan ATP Finals thlengtu an ni bawk.

Italian player ten Australian Open nomawi hi an la chawi thei ngai lo, a vawi khat nan Berrettini-a'n champion a tum dawn. A hmabak erawh a hautak dawn, chutih rualin a khelh chhoh dan thlir chuan Nadal hneh turin theihna a nei.

Berrettini chuan, "Italian tennis tan mellung pawimawh phun ka duh, ka ti hlawhtling thei a nih chuan kei leh Italian tennis tan thil ropui a ni ang," tiin a sawi a, a hmaah Nadal ding dawn mah se a zam duh lo.

Seeded pasarihna Berrettini hian nikum khan Wimbledon final a lut thei, mahse Novak Djokovic a ngam lo. Australian Open bikah chuan semifinal a thlen vawi khatna a ni, tlang tur chuan thil awlsam lo tak a tih a ngai dawn - chu chu Nadal hneh a ni.

Match nga an khelh tawh chinah Nadal-a service hi vawi li chiah an khingpuiten an la chhuhsak. Berrettini-a'n amah service a hum a ngaih dawn bakah Spanish star service laiin thapui a thawh leh zual a ngai dawn hle.

A ruh no no chhuak
Federer, Nadal leh Djokovic ten tennis an awp hneh hle a, midang tan hmun an kian meuh lo. Mahse, theihna nei sang bik Daniil Medvedev hmel a lo lang a, season hmasa khan Russian tlangval hian Djokovic hnehin US Open title a la.

Tun ṭumah hian Djokovic a inlan loh avangin Medvedev hi ranking sang leh seeded sang ber a ni a, hard court hi a inkhelh thiamna hmun a nih avangin a lakah beisei pawh a sang - tun ṭumah hian a rawn champion thei a nih ngat chuan a hmabak a êng khawp ang.

World number 1 hian quarterfinal-ah set hnih a hloh hnuin hnehna a chang let thei, a chak hnuah Medvedev chuan, "Novak angin a ṭha zawk nihna lantir a ngai," tiin world number Djokovic anga rilru paukhauh a ngaih thu a sawi a, vawiina pawh hlauh nei loin a inkhel ang.

Medvedev hma a ding tur Stefanos Tsitsipas hi player chhuak thar beisei awm zinga mi a ni, kum 23 mi Tsitsipas tan amah aia kum hnihna upa zawk Medvedev hi chung en tur a ni bik lo, an inhlau lo tawn viau ang, inkhel a hmuhnawm dawn.

Tennis roreltu thar nih châka tuihal Tsitsipas hian Greek tlangval huaisen a nih ang taka final a invaw kai a nih chuan inrintawkna a nei sang dawn, thahrui a ngah avangin semifinal-ah hian set nga khelh a pawi ti lo ang.

Australian Open Mipa Semifinal
January 28, Zirtawpni
Matteo Berrettini 09:00 AM Rafael Nadal
Stefanos Tsitsipas 02:00 PM Daniil Medvedev
Note: Inkhel hi Sony TV-ah live a pek chhuah a ni ang.