Peru hmachhawn turin Falcao a inpeih

Colombia chuan zanin dar 2:30 hian El Metro, Barranquilla-ah Peru an mikhual dawn. Reinaldo Rueda kaihhruai Colombia hian South America aṭanga World Cup khel turin beiseina sang tak an nei a, tunah hian palina dinhmun luah mekin an hmachhawn tur Peru hi pangnaah an awm.

Tun season-ah kum 36 mi Radamel Falcao a vul ṭha leh a, La Liga-ah Rayo Vallecano tan a hming chher hle. Falcao hian league match 13 aṭangin goal nga a khung a, Rayo Vallecano hi pariatnaah an awm mek.

Falcao chuan, "Qatar a zin theih hi ka duhthusam a ni a, chumi tur chuan ticket kan neih hmasak a ngai. Peru leh Argentina nena kan inkhel tur hi a pawimawh a, chutihrualin kan inkhelh hmabak hrim hrim hi chu final ang vek a ni. Pathianin rem a tih chuan kan chak ngei ang," tiin a sawi.

Colombia hian February 2, Nilaini zing dar 5:00-ah Argentina nen an inkhel leh dawn a, Facao chuan Lionel Messi a awm dawn loh avanga an hna a ziaawm hret tur thu a sawi.

Manchester United leh Chelsea tan pawha khel tawh Falcao hian ram tan match 97-ah goal 35 a khung tawh a, Colombia tana goal khung tam ber record chelhtu a ni.