Balotteli-a'n Italy World Cup a hruai thleng thei ang em?

Italy-in World Cup playoff an khel dawn a, an hmachhawn theih zingah Cristiano Ronaldo telna Portugal an tel. European champion Azzurri chanchin ngaihnawmna belhchhah turin Roberto Mancini-a'n kum thum hnuah ram tana khel turin Mario Balotteli a ko. Italy chanchin a ngaihnawm ta hle.

Tu nge Mario?
Footballer zinga chanchin ngaihnawm ber zinga mi Mario Balotelli hian a kalna apiangah chanchin a ngah zel a, football a khelh hma aṭangin chanchin ngaihnawm tak a nei hrim hrim.

Balotelli hi a pian tirh chuan Mario Barwuah tiin a hming an vuah a, Palermo, Sicily-a piang ni mah se a thlahtute hi Ghana aṭanga Italy-a pem lut an ni. Chhungkaw reithei tak aṭanga seilian an ni a, a naupan lai hian a hrisel loh avangin a nu leh paten enkawlna tur an nei lo. Hemi a nih avang hian Balotelli chhungkuain an la a, heta ṭang hian Mario Balotelli hming a pu ṭan.

Balotelli hian football-ah talent ṭha tak a nei a, Serie C club Lumezzane aṭanga bul ṭanin kum 15 mi a nihin senior team tan a khel ṭan. Italian forward hian kum 15 a nih hian Barcelona-ah trial a nei a, a tling lo.

Kum 16 mi a nihin Inter Milan-in an la a, heta ṭang hian khawvel huapah a hming a chher. Inter hi Serie A nomawi vawi thum a chawipui bakah Coppa Italia, Supercopppa Italiana leh Champions League nomawi vawi khat ṭheuh a chawipui.

Inter aṭangin Man City a zawm a, tuna Italy manager Roberto Mancini hnuaiah Premier League leh FA Cup nomawi a chawi. Hemi hnu hian club lian dang AC Milan leh Liverpool tan te khel leh mah se a hnung tawlh hret hret. Ligue 1 club Nice leh Marseille, Italian club Brescia leh Monza tana a khelh hnuin nikum July thla khan Turkish Süper Lig kai thar Adana Demirspor a zawm.

Balotelli hian chanchin a ngah avangin kum upa tawh takah a ngaih theih a, amaherawhchu kum 31 mi chauh a la ni. Mancini-a'n a theihna a hrechiang a, FIFA World Cup playoff khel tur probables squad-a a thlang hi a mak hran lo.

'Why always me?'
Khawvel coach lar Jose Mourinho pawhin Mario Balotelli chanchin hi sawi nuam a ti a, a hlimpui hle. Portuguese manager hian Real Madrid a enkawl lai khan Inter Milan hunlai a sawi chhuak a, Mourinho chuan, "Inter Milan-a kum hnih ka awm chhunga Mario nena kan chanchin kha phek 200 chuang ka ziak thei ang a, lehkhabu thawnthu ngaihnawm lam ni loin fiamthu bu a ni ang.

"Ṭum khat chu Kazan-ah Champions League kan khel a, ka striker ho zawng zawng an inhliam. Mario chauh ka nei a, minute 43-na chhoah yellow card a hmu. Dressing room-ah ka naute fuih nan minute 15 hun ka nei a, minute 14 chu Mario fuih nan ka hmang. Mario ka thlak thei lo che, striker dang bench-ah ka nei tawh lo. Tuma lakah foul lo la, ball nen chauh inkhel ang che. Ball kan hloh chuan i chuh ve a ngai lo. An tih el che pawhin i chhang tur a ni lo, referee-in a tisual a nih pawhin i sawisel tur a ni lo. Khawngaihtakin Mario, tiin ka fuih. Minute 46-naah red card a hmu nghal," tiin nui hak hak pahin Mario chanchin a sawi.

Italian striker hian chanchin chhe lam sawi tur a ngah ang thoin chanchin ṭha lam pawh a nei a, Manchester City tana a khelh laiin Manchester United lakah a pet goal. A goal khung lawm nan a jersey hnuaia 'Why Always Me?' tih inziak kawr chu a pholang a, a larpui hle.

Euro 2012-ah pawh Germany lakah goal pawimawh a khung a, Balotelli hi a goal khung lawm nan a kawr phelhin a inti sek a, goal khung lawm dan sawi hlawh ber zinga mi a tling. Tuna Italy tana kotu Mancini nen ngei pawh hian buaina an lo nei tawh ṭhin a, January 2013 khan training-naah an in hau chiam a, nipuiah Balotelli hi an hralh nghal.

An ko miau si!
Mancini hian Italy a enkawl hnuah Mario hi a ko a, chutihrualin player 35 a ko tih hriat a ṭha. Final squad-ah Balotelli hi a tel ngei dawn em, tih a la chiang lo.

Italy manager Mancini chuan, "Mario hian engmah min tiam a ṭul lo a, keipawhin engmah ka tiam dawn lo. Training-naa a khelh dan kan thlir ang a, min puih theih dan a awm em, tih kan zirchiang ang," tiin an sawi.

Turkey lamah Balotelli hian harhtharna a chang a, Turkish sports writer pakhat chuan, "Team zinga mi inpe leh nungchang ṭha ber," tiin a ziak. Italian striker hian Adana Demirspor hi Turkish league sang berah a chet ṭhatpui a, table-ah palina an ni mek - inelna hrang hranga match 21 a khelh tawh aṭangin goal kua a khung.

Italian football journalist Daniele Verri ve thung chuan, "Balotteli hian ram tan match 36 khelhah goal 14 a khung a, manager Mancini hian second hand car a lei ni berah ka ngai. Chutihrualin fan-te erawhin Mancini chungah rinna an nghat ang," tiin Euro 2020 champion puitu coach thutlukna chu a pawm chiah loh thu a sawi.

A elpui turte
Italy hian forward-a an kohte chu Mario Balotelli (Adana Demirspor), Domenico Berardi (Sassuolo), Federico Bernardeschi (Juventus), Ciro Immobile (Lazio), Lorenzo Insigne (Napoli), Joao Pedro (Cagliari), Giacomo Raspadori (Sassuolo), Gianluca Scamacca (Sassuolo), Mattia Zaccagni (Lazio) leh Nicolo Zaniolo (Roma) te an ni.

Berardi, Immobile, Insigne leh Bernardeschi ten Euro 2020-ah hmun pawimawh an chang a, Federico Chiesa erawh hliam vangin playoff-ah a khel thei dawn lo. Chutihrualin Napoli captain Insigne-a'n season tharah MLS club Toronto a zawm dawn a, Italy coaching staff tan thu hriat nuam a ni lo.

Italy tlarhma bihchian chuan siksawi hret a ngai tih a hmuh theih a, Mancini-a'n Balotelli a koh chhan hi a hriatthiam theih. Chutihrualin manager tawnhriat nei ṭha Mancini hian kum upa ringawt a ko lo a, Euro 2020-a a koh zinga mi Raspadori te pawh a ko tel.

Watford tana khel mek Brazil-a piang kum 20 mi Joao Pedro, ram tana la inlan lo kum 26 mi Mattia Zaccagni bakah kum 22 mi Zaniolo leh kum 23 mi Scamacca te a ko tel. Mancini-a'n uluk takin player a thlangah a ngaih theih a, Balotelli tan World Cup-a Italy hruai thleng turin squad-a tel phak phawt a ngai dawn a ni.