Mizo nula 3 telna an champion

Tamil Nadu Women's League-ah Mizo nula pathum telna Sethu FC chuan match 10 an khelhah hnehna chang vekin chiang takin an champion. Mizo nula pathum Grace Lalrampari, Elizabeth Vanlalmawii leh Ngopowdi ten mimal chawimawina an dawng vek bawk.

Nimin khan JN Stadium, Chennai-ah league match hnuhnung ber khelh a ni a, Sethu FC hian an match hnuhnung berah FC Thamizhatchi chu 3-0 in an hneh. Siaha nula Ngopowd-i'n match hnuhnung berah hian goal a khung a, best defender a thlan a ni.

Salem Veng nula Grace-i'n tun ṭum inelnaah goal nga a khung a, corner kick aṭanga pet goal tlang nghal ṭum hnih ngawt a nei. Grace-i hi best midfielder-ah an thlang.

Kolasib nula Elizabeth Vanlalmawii'n goal 19 tehmeuh a khung a, top scorer a ni. Mizo nula pathumte hi nikum November - December thlaa Senior Women's National Football Championship-a Mizoramin semifinal an thlen theih nan khan player pawimawh an ni vek.