AFCON: Ivory Coast pet chhuaktu Egypt

Africa Cup of Nations round of 16 chu khelh zawh a ni ta a, Nilaini zana quarterfinal inkhel tur zawnnaah team langsar Ivory Coast leh Mali ten fiahna an paltlang zo ve ta lo.

Ivory Coast hi Egypt nen 0-0 in an inhnehtawk a, penalty hmanga chak zawk zawn a nih hnuah 5-4 in Egypt an chak a, Mohamed Salah leh a ṭhianten quarterfinal an lut - Manchester United defender Eric Bailly chuan penalty a hlah a, Salah-a'n a pet goal thung.

Mali-in last 16-ah Equatorial Guinea an chan avangin awlsam taka quarterfinal lut tura ngaih an ni a, mahse, football mawina kan hmu. Hun pangngaiah 0-0 in an inhnehtawk a, penalty-ah 6-5 a chakin Equatorial Guinea an tlang!

Round of 16 khelh zawh a ni a, zan hnih an chawlh hnuah Inrinni zan aṭangin quarterfinal khelh ṭan a ni leh ang a, Pathianni zanah semi­final khel tur a chiang nghal ang.

Inkhel hmuhnawm
Douala-ah khelmual ṭha tawk lo mah se team pahnih inkhel a hmuhnawm a, an intawn hma hauh aṭangin chak tur zawk rin thiam a har - Egypt hi team ṭha tak ni mah se Nigeria ngam loa group-a pahnihna an ni.

Ivory Coast erawh group hma­hruaitu ni chunga last 16 lut an ni a, champion lai Algeria an hneh bawk avangin inrintawkna sang tak nen Salah leh a ṭhiante hi an hmachhawn.

First half-a chance nei ṭha zawk erawh Egypt an ni a, VfB Stuttgart forward Omar Marmoush chuan crossbar a tih per a, Salah hun ṭha neih chu Ivorian keeper tawnhriat nei ṭha Badra Ali Sangaré chuan vawi hnih zet a dansak bawk.

Ivory Coast an insiamṭha hret hret a, Ibrahim Sangare-a'n Elephants (Ivory Coast sawina) tan chance a rawn nei ve - mahse, Egypt keeper Mohamed El Shenawy chuan a lo dansak.

Egypt beiseina
Second half ṭantir lamah Egypt lamin ngai an rawn awh chho a, mahse , Amr El Soleya chuan khung ngei tura ngaih a nih laiin goal a khung thei lo a, bench aṭanga luhtir Trezeguet chuan uiawm takin a hlah bawk.

Egypt tan keeper El Shenawy a che ṭha a, Sebastien Haller leh Wilfried Zaha khung tur nia lang a dansak ve ve - mahse, minute 88-naah hliam vangin lakchhuah a ni a, a hmun ruakah Gabaski a rawn lut.

Minute 90 chhung goal a luh loh hnuah extra time khelh a ni a, Egypt striker Mohamed Sherif -a'n a tauh goal loh laiin Ivory keeper Sangare chuan Zizo chance neih a dansak a, Gabaski chuan midfielder Sangare khung tur a dansak bawk.

Hun tawp hnaih tawh lamah Trezeguet-a'n chance duhawm a nei nawn a, mahse, Aston Villa midfielder hian an ram tana hming chherna remchang a neih a chhawr lo.

Penalty chu
Minute 120 chhungin tlarhma nei ṭha Egypt leh Ivory Coast ten goal khung an harsat ve ve a, penalty hmangin a tlang tur zawk chinfel a ṭul - hliam vanga second choice keeper hman ngai Egypt chu dinhmun chhezawka ngaih an ni.

Mahse, Egypt tan an vanduaina chu vanneihnaah a chang a, first choice keeper El Shenawy inhliam vanga lut Gabaski chuan United defender Eric Bailly-a penalty pet chu a dang.

Hun pangngaia khel ṭha tak Bailly-a'n hun pawimawhah a team tan a pet goal thei lo a, Egypt lamin an khung vek thung - Salah chuan a hmawr rawn bawkin penalty hi a chhuih lut a, boruak sangah a talbuai lo.

Round of 16-a team ṭha Ivory Coast changtu Egypt-in quarter­final-ah pawh hmachhawn châkawm lo ber pawl Morocco an hmachhawn dawn a, an zinkawng a namai lo hle.

Mali an tla
Equatorial Guinea goalkeeper Jesus Owono chu an ram tan 'hero' a ni a, Mali nen 0-0 a an inhnehtawk hnuah penalty vawi hnih a dang a, a team chu AFCON-a a thiam pariat zingah a telpui.

FIFA ranking-a Equatorial Guinea aia hmun 61-a sang zawk Mali-in inkhel an thunun a, mahse, RB Leipzig midfielder Amadou Haidara, Red Bull Salzburg midfielder Mohamed Camara leh Southampton winger Moussa Djenepo ten Mali tan an chance neih an chhawr thei lo.

Group Stage-a Algeria hnehtu Equatorial Guinea-in chance sawi tur nei tam lo mah se an inringtawk a, Algeria hneh thei an nih avangin Mali lakah an zam lo - a bik takin bench aṭanga luhtir defender Emilio Nsue chu a thawhhlawk hle.

Minute 120 chhung goal a luh loh avangin penalty hmangin chinfel a ni a, kum 20 mi keeper Owono chuan hmabak a nei êng tih pholangin vawi hnih a dang a, 6-5 in rin loh zawk an chak daih!

AFCON - Last 16
January 26, Nilaini Zan
Ivory Coast 0 - 0 Egypt
*Penalty-ah 5-4 in Egypt an chak
Penalty pet dan
Ivory Coast
Nicolas Pépé G
Ibrahim Sangaré G
Eric Bailly X
Maxwel Cornet G
Wilfried Zaha G

Egypt
Ahmed Sayed G
Amr El Solia G
Omar Kamal G
Mohamed Abdelmonem G
Mohamed Salah G
Mali 0 - 0 Equatorial Guinea
*Penalty-ah 6-5 in Equatorial Guinea an chak
Penalty pet dan
Mali
Adama Traoré G
Moussa Djenepo G
Massadio Haïdara X
Hamari Traoré X
El Bilal Touré G
Aliou Dieng G
Mohamed Camara G
Falaye Sacko X

Equatorial Guinea
Emilio Nsue X
Rubén Belima G
Carlos Akapo G
Jannick Buyla G
Pablo Ganet X
Saúl Coco G
Iban Salvador G
Santiago Eneme G

Quarterfinal Fixtures
January 29, Inrinni Zan
Gambia 09:30 PM Cameroon
Burkina Faso 12:30 AM Tunisia
January 30, Pathianni Zan
Egypt 08:30 PM Morocco
Senegal 12:30 AM Equatorial Guinea