Premier League-in Covid-19 dan an thlak

Premier League chuan Covid-19 chungchanga inkaihhruaina dan an thlak hret a, club tan inkhelh hun sawn dil turin player pali talin Covid-19 hri an kai a ṭul dawn. Dan thar hi February 5-a Burnley leh Watford inkhelh hun aṭangin hman ṭan a ni ang.

Premier League chuan, "January 26 khan club nen meeting neih a ni a, Premier League inkhelh hun chungchang sawiho a ni. Tuna chinah chuan player indaih loh vanga inkhelh hun sawn a nih dawn chuan a tlem berah squad aṭangin player pali Covid-19 positive a ngai," tiin thuchhuah a siam.

Tun season-ah Covid-19 vangin Premier League match 21 inkhelh hun sawn a ni tawh. Kar liam ta khan Premier League-ah Covid-19 positive 16 an awm a, December 5 hnua an tlem ber ṭum a ni.

December 18-a Manchester United leh Brighton & Hove Albion inkhel tur Covid-19 vanga inkhelh hun an sawn chu February 15, Thawhlehni zan dar 1:45-ah khelh a ni dawn.