India tan Siami goal a tâwk lo

Women's Hockey Asia Cup 2022 khelh laiah India nula ten final an lut phak lo. Semifinal-ah India tan Lalremsiami Hmar chuan goal khat khung mah se South Korea lakah 3-2 in an chak lo a ni.

Semifinal inkhel dangah a thlengtu Japan chuan China 2-1 in an hneh ve thung. Zaninah India leh China te hian pathumna an inchuh ang a, a sang berah pawh pathumna bak an beisei thei tawh lo.

Final thleng zo lo mah se India tan chanchin lawmawm a ni tho. Semifinal thleng phak team pali chin hi Hockey World Cup khel turin an tling nghal a, inelna lian leh ngaihhlutah India nulate an inlan phak dawn tihna a ni.

South Korea lakah India hi an vannei tawk lo. Siami goal khung hmasa zawk chu an pawmsak lo, pawm ni se chuan hma an hruai thei dawn. Mahse, a hnu lamah Neha (28') hmangin India hian hma an hruai ta tho.

Amaherawhchu, team ṭha Korea lamin Eunbi Cheon (31'), Seung Ju Lee (45') leh Hyejin Cho (47') te hmangin an chhang let a, minute 54-naa Siami goal khungin India beiseina siamsak ve leh deuh mah se an umphak thei ta lo.

Mizo nula Remsiami chuan, "Theihtawp kan chhuah a, mahse final kan thleng zo ta lo hi a pawi kan ti hle. Player ṭha ṭhenkhat an zin ve loh avangin kan ṭhat dan berin kan khel hleithei lo," tiin a sawi. Captain Rani Rampal pawh a zin ve lo a ni.

Hockey Asia Cup khelh hnuhnung berah khan India hi an champion. Final inkhel pawimawhah Remsiami goal hmangin Japan an hneh, mahse kuminah erawh an nomawi an hum thei lo a, pathumna tal nih tumin an bei ang.