Hockey legend Charanjit Singh a thi

India tana Olympic gold medal vaw chhuak tawhtu Charanjit Singh chu nimin khan a thi. Kum nga chhung a lo tawrh tawh stroke vangin an chenna Una, Himachal Pradesh-ah a thi a, kum 90 mi niin fapa pahnih leh fanu pakhat a nei.

Tokyo Olympic 1964-ah khan Charanjit hi India captain a ni a, a hoin India chuan gold medal an la. Olympic bakah hian 1962 Asian Games-ah khan India tan silver medal an la bawk, ani hnuah hian Himachal Pradesh aṭangin India captain pakhat chiah an la awm.

A fapa VP Singh chuan, "Ka pa hian kum nga chhung chu natna khirh tak a nei tawh a, tiang hawl lo chuan a kal thei lo. Tun hnai thla thum chhung vel chu khum betin a awm," tiin a pa chungchang a sawi.

Charanjit-a nupui hi kum 12 liam ta khan a thi tawh, a fapa upa zawk chu doctor niin Canada ramah a awm. A fanu pawhin New Delhi-ah pasal a nei tawh, a hun hnuhnungah hian a fapa napang zawk VP Singh hian a awmpui.