WBC youth champion Lalrinsanga Tlau chu zanin hian Dubai Fight Night-ah a inlan dawn a, dar 10:35-ah Georgian boxer Ilia Beruashvili nen an in hmachhawn dawn. Mizo tlangval inhnek hi Zonet leh Book My Show (online) hmangin a en theih ang.
Dubai Fight Night-a main event tur hi WBO Cruiserweight African Championship title inchuh a ni dawn a, Rolly Lambert Fogoum (Cameroon) leh John Napari (Ghana) te an inhmachhawn ang. BoxRec ranking-a Indian boxer zinga number 1 Faizan Anwar pawh a inlan dawn a, Kolkata boxer khingpui tur chu Romanian boxer Octavian Gratii a ni.
Hei le, Sangtea
Khawruhlian tlangval Sangtea hi Mizo boxer zinga professional luhchilh hmasa ber a ni a, September 22, 2019 khan Delhi-ah Digari Mahesh chu unanimous decision hmangin a hneh. Box Rec-ah Sangtea hi Indian boxer zingah palina a ni pha a, a chungah Faizan Anwar, Vijender Singh leh Brijesh Meena te chauh an awm.
Top 50 chinah hian Mizo boxer pahnih dang Vanlalawmpuia (26-na) leh NT Lalbiakkima (40-na) te an tel a, Sangtea hi tun dinhmunah chuan Mizo professional boxer zinga ranking sang ber a ni. Sangtea hian professional fight vawi nga a hmachhawn tawh a, a chak vek bakah ṭum hnih a khingpui a knockout.
Sangtea khingpui tur Ilia Beruashvili hian kum 2017 daih tawh khan professional boxing hi a luhchilh a, Mizo tlangval ang thoin a fight hmasa panga a chak vek. Chutihrualin Georgian boxer hian record a nei ṭha zui lo a, ṭum 23 a inhnek tawhah vawi kua a chak.
Hmasawn duh Sangtea
Mizo professional boxer hmasa ber Sangtea hian hmasawn duhin fight vawi nga a neiha a hnuhnung pali buaipui Grassroot Boxing Promotions and Management-ah contract a ziah belh. Grassroot Boxing buaipuinain Mizo tlangval hi foreign coach hnuaiah a awm a, amateur boxing-a record nei ṭha ber zinga mi Guillermo Rigondeaux (El Chacal) nen an training ho thei hial.
Sangtea chuan, "Boxing-ah hian thui tak thlen ka duh a, ka tana ṭha tura ka hriat angin thutlukna ka siam. Cuban coach hnuaiah Cuban boxer te nen kan training ho thei a, thil tam tak ka zir belh," tiin Vanglaini a hrilh a, zanina a khingpui tur Georgian boxer Ilia Beruashvili pawh hneh ngei a inbeisei thu a sawi.
Grassroot Boxing dintu Mujtaba Kamal chuan, "India ramah boxing tih hmasawn zel ka tum a, Mizoten theihna sang tak an nei hi ka lawm. Mizo boxer-te hma khua ka ngai a, an theihna tih pun bakah sum leh paia hlawkna an neih theih nan theihtawp ka chhuah. Sangtea hian pay per view aṭang leh sponsor aṭanga sum hmuh aṭangin 10% a dawng dawn a, Mizoram sorkar aṭanga sum a dawng a nih pawhin amahin a hui vek ang. Contract-ah chiang taka ziah vek a ni," tiin Vanglaini a hrilh.
Mizo tlangval inhnek thlir duh tan Zonet kaltlangin a en thei a, hrechiang duh tan Zonet operator te biak tur a ni. Sangtea inhnek bakah hian boxer ṭha dang inhnek hi a thlir theih vek ang.
