Mourinho leh Roma an mualpho
Jose Mourinho enkawl AS Roma chu Bodo/Glimt lakah 6-1 in an chak lo! Ningani zan Europa Conference League-ah Mourinho a mualpho a, a club enkawl hnuhnung zawk Tottenham Hotspur pawh an mikhualna ramah 1-0 in an tlawm bawk.
Italian club Roma hi Bodo/Glimt lakah chuan chungnung viau tura ngaih an ni. Mahse, Norway champion hian a khat mawi tawkin an mikhual Mourinho leh a naute hi goal khung an lawm khum a ni deuh ber mai.
Mualphona
Mourinho hian tun hmain - Porto, Chelsea, Real Madrid leh Inter Milan te hlawhtling takin a lo enkawl tawh. Manchester United leh Tottenham a enkawl laiin che ṭha tawk lo mah se mualpho lutuk a nei ngai meuh lo.
Team enkawl hna a thawh aṭangin match 1008 a hmachhawn tlinna a ni a, match khata goal ruk an chhuah tlinna hmasa ber an tawng hial. Real a enkawl lai khan Barcelona lakah 5-0 in an tlawm tawh, tun ṭum hi goal an chhuah hnem ber a ni.
Bodo/Glimt tan hian Erik Botheim leh Ola Solbakken ten goal hnih ve ve an khung a, Patrick Berg leh Amahl Pellegrino ten an khung ve bawk. Roma tana Carles Perez-a goal khat neih chu mualpho hliah khuh nan pawh a tawk zo lo.
Roma manager Mourinho chuan, "Hliam kan ngah avangin inkhel thei player 13 chauh kan nei, tawnhriat nei tlem leh nem zawkte an luh a ngai a, ka duh angin ka nauten an khel thei lo," a ti a, thutlukna siamtu a nih avangin ama mawhphurhna a nih thu a sawi bawk.
Spurs an tlawm
Newcastle lakah ṭha takin an khel a, manager Nuno Espirito Santo-a'n a player ṭha ṭhenkhat a hahchawlhtir. Harry Kane leh Son Heung-min te tel loin Netherlands-ah an zin chhuak, minute 90 chhungin goal an khung thei lo.
Dutch club Vitesse Arnhem hi season hmasa khan Eredivisie-ah palina an ni, an nihna aṭanga teh mai chuan Spurs tan hna harsa tur a ni lo. Mahse, minute 78-naa midfielder Maximilian Wittek goal khat khung chu an mikhual team hneh nan a tawk.
Spurs manager Nuno chuan, "Europa Conference League chu hriatthiam a har ṭhin hle, team ṭhenkhat hian min barakhaih ṭhin, tun ṭumah pawh team ṭha tak kan hneh lo. Chak lo mah ila kan match hmabak pahnih chu London-ah kan khel dawn, kan mamawh zat pawt kan hmuh ka ring," a ti.
Tottenham hian Pathianni zanah West Ham nen Premier League an khel zui leh nghal dawn. Hammers hi Europa League lama vung taka kal lai an ni thung a, chak lo hlim Spurs tan hmachhawn an awlsam lo ang.