Jersey dang a hak ka ring ngai lo - Ronaldinho

Ronaldinho chuan tun hnai khan Paris Saint-Germain leh RB Leipzig ten Champions League an khel lai a hmunah a en a, tun hma lama a lo khelhpui tawh ṭhin Lionel Messi-a'n Barcelona ni lo jersey dang a ha mai chu mak a tih thu a sawi.

Nipui bazar lai khan Messi hian PSG hi a pan a, a naupan lai aṭanga a awmna Catalan club a chhuahsan hi football khawvel chuan mak a ti hle. Paris club tan hian Ligue 1 lamah goal la khung lo mah se UCL-ah goal thum a kungsak der tawh.

Barca legend Ronaldinho chuan, "Barcelona ka zawm tirh khan Messi hi kum naupangte a la ni, chuti chung chuan player thiam bik a nihzia an lo sawi nasa tawh hle. Kan training ho a, kei pawhin khelmual leh training-na hmunah mi danglam bik a nihna chu ka hmu.

"European football a khelh tirh te pawh kha ka la hria, ka lawmpui hle. Barcelona-ah a hun pum a hmang turah ka ngai a, a chhuak mai khan min barakhaih hle," tiin a sawi. Leipzig an hneh hnuin Messi hian khelmual sira awm Ronaldinho hi va panin an inkuah vawng vawng a ni.

Argentina captain hian hliam leh World Cup qualifier khelh vangin PSG tan match a la khel tam tawk lo. League lamah eng ang tak nge a nih chu Pathianni zan hian fiahin a awm dawn, pathumna ni lai Marseille an lenchilh ang.