West Ham an la chak vek

David Moyes-a enkawl West Ham United chu Europa League lamah dan theih loh ang maiin an kaltluang. Hammers hian an mikhual Genk chu 3-0 in an sawp a, group match vawi thum an khelh tawhah an la chak vek.

West Ham hian point kua hmuin Group H hmahruaitu an ni a, an hnuaiah hian - Dinamo Zagreb, Rapid Vienna leh Genk an awm, team pathum hian point thum ṭheuh an nei thung a ni.

Hammers tan Craig Dawson, Issa Diop leh Jarrod Bowen ten goal khat ṭheuh an khung a, mikhual lamin a chhanletna tur an nei lo. Moyes-a naute hi chhiarkawp danin tlang lo thei an la ni a, chutih rualin knock out stage chiang tawha sawi ngam a ni bawk.

West Ham manager Moyes chuan, "Ka naute khan tlawm an duh lo a ni satliah lo a, goal chhuah loh kha an thupui a ni. Kan lama lut tur ṭum hnih ṭha zetin kan dang thei a, inrintawkna kan neih san phah hle," a ti. Genk leh Vienna an la lenchilh ve leh ang.

Ningani zan Europa League inkhel dangah Napoli chuan Legia Warsaw 3-0 in an hneh ve bawk a, captain Lorenzo Insigne, Victor Osimhen leh Matteo Politano ten goal khat ṭheuh an khung, an goal pathum hi second half-a lut vek a ni.

Napoli hian Serie A season bul an ṭan fuh a, match riat an chak vek. Mahse European football lamah erawh an che fuh hleithei lo, an match hmasa pahnihah chak ni hmel an hmu lo - tunah erawh an nihna tak an poh chhuak ta.