Tuchel chungah Dortmund thinrim

Borussia Dortmund chu Chelsea coach Thomas Tuchel-a'n ualau taka an striker Erling Haaland chungchang a lo sawi avangin German coach chungah hian an lungawi lo nia sawi a ni!

Tuchel hian German chanchinbu Bild hnenah nipui lai khan Haaland an ngaihven thu a sawi a, German coach chuan, "Haaland chungchang hi kan sawi fo a, nipui transfer-ah pawh khan kan ngaihven. Mahse, khatihlai khan ani lakluh chu thil theih loh ang mai a ni," a ti.

Dortmund boss hlui hian sawi zawmin, "Haaland hi player thiam bik a nih avangin a chungchang hi chu kan sawi fo a, Champions League-a kan elpui Dortmund tan player pawimawh tak a ni bawk.

"Mahse, tunah chuan ngunthluk taka sawi engmah a awm rih lo a, mahse, enge thleng zel chu kan la hria ang chu," a ti a, Dortmund tan Tuchel-a thusawi hi hriat a nuam lo ang.

Bild vekin an tarlan danin Dortmund chu Tuchel-a'n an player chungchang a sawi chiam hi an lawm lo hle - kum 21 mi striker hi season tawpah a duh chuan pound maktaduai 75-in a chhuak thei dawn.

Norwegian striker hian tun season-ah match 10 khelin goal 13 a khung der tawh a, Tuchel-a'n a 'awt' hi a awm lo hran lo a, Dortmund-in chelh an duh avangin Tuchel-a ṭawngkam an lawm lo pawh hi a awm viau.

Tuchel-a enkawl Chelsea hian vawiin tlai dar 5:00-ah league match khel turin Nor-wich City an mikhual dawn a, hliam vangin striker Romelu Lukaku leh Timo Werner bakah forward Christian Pulisic te an chhawr thei dawn lo.

Norwich midfielder Billy Gilmour chu Chelsea aṭanga loan-a hawh a nih avangin Blues a hmachhawn a rem lo a, Todd Cantwell, Sam Byram leh Christoph Zimmermann te an la inlan thei dawn lo bawk.