El Clasico: Barca khelmualah Real Madrid

Football khawvela boruak 'hot' ber pawl El Clasico chu Pathianni zan dar 7:45-ah khelh a ni dawn a, team talbuai Barcelona-in insiamṭha mek Real Madrid an mikhual dawn.

Kum engemaw zat hnua a vawi khat nan Cristiano Ronaldo leh Lionel Messi tel loin El Clasico khelh a ni dawn a, mi tam takin Spanish football tingaihnawmtu inkhel hlutna hi a tlakhniam phahah an ngai.

Mahse, a ni lo - Ronaldo hnuah Messi hmel hmu loin El Clasico en dawn mah ila, player ropui pahnih awm hma daih tawh khan El Clasico hi ropui taka khelh a lo ni tawh ṭhin a, club pahnih inhuatna leh inhalna a nep phah lo.

Team pahnihin rawlthar duhawm tak tak an la kawl a, Vinícius Júnior, Rodrygo Goes, Ansu Fati leh Gavi te ho inhmachhawn tur hi football ngaina inti tan chuan hmaih phal chi a ni dawn lo - a hmuhnawm ang tih ringhlel suh.

Real an ṭha
Italian coach ṭha mi Carlo Ancelotti enkawlna hnuaiah Real Madrid-in insiamṭhat hna an thawk mek a, AC Milan coach hlui kaihhruaina hnuaia hmasawn bera chhal ngam chu Vinícius a ni.

Kum 21 mi forward hian King Carlo hnuaia a khelh hma chuan Real tan season khatah goal ruk aia tam khung a nei ngai lo a, tun season-ah erawh match 11 khelin goal sarih a khung a, assist vawi nga a nei tling der tawh!

Barca tan Vinícius hi ven a ṭul dawn tih a chiang a, ngaihthah thiang lo Karim Benzema a la awm cheu bawk - kum 33 mi striker hian tun season-a match 11 a khelhah goal 11 a khung a, assist vawi riat a nei.

Real tan hliam vangin Eden Hazard inlan theih a la rinawm loh a, mahse, Hazard tel chunga Sheriff Tiraspol leh Espanyol an ngam loh hnuah Belgian forward tel loin Shakhtar Donetsk chu 5-0 in an sawp a, an buai phah lo ang.

Barca an buai?
Sum vanga Barca buaina sawi nawn a ngai lo a, khelmual chhungah an buai tel avangin thla hmasa lawk khan coach Ronald Koeman ban a nih dawn leh dawn loh thlengin sawi a la awm.

Mahse, media lamin an sawi ang em emin team pahnih hi an inthlau lo - table-ah Barca hi pasarihna daih ni mah se pahnihna Real Madrid nena an inthlauhna hi khelh zat inangah point hnih chauh a ni a, Pathianni zanah an hneh theih chuan an tlanpel daih thei dawn tihna a ni.

Barca-in hliam vangin Pedri chhawr thei dawn lo mah se midfield-a khel turin Frenkie de Jong, Sergio Busquets leh Gavi an nei a, lungngaihna tur a awm lo. Tlarhmaa Memphis Depay kawppui turin Sergio Aguero a dam ṭha ta bawk.

Champions League-a 1-0 a Dynamo Kiev hneh hlim Barca tan Gerard Pique, Jordi Alba leh Ansu Fati te an 'form' chho bawk a, Koeman-a'n thutlukna dik a siam theih chuan Real hneh turin Barca an ṭha tawk.