Schwartzman lakah Murray a chak lo

European Open khelh laiah Andy Murray chu Diego Schwartzman hneh loin a zinkawng a tawp. Britain tlangval hi set hmasa zawkah 4-1 in kal fal hman mah se, world number 14 Schwartzman hian 6-4, 7-6 (8-6) in a lehthal.

World number 1 hlui Murray hian theihtawp a chhuah, set hnihnaah hian 4-2 in hniam zawk mah se tie break a thlenpui thei a, chak zo lo mah se player ṭha lakah ṭha takin a khel chhuak thei tawh tih a lantir.

Kum 34 mi Murray chuan, "Infiamnaah chuan chak zawk nih a pawimawh, ṭha takin khel mah ila a chak lo zawk kan nih chuan hriatreng kan ni ngai lo, chuvangin chak loh hi chu a pawi," tiin chak tuma theihtawp a chhuah thu a sawi.

Kar leh hian Rolex Paris Masters khelh tur a awm leh nghal dawn, Grand Slam vawi thum champion tawh Murray hian wildcard a dawng lo a nih chuan qualifying aṭangin a khelh ṭan a ngai ang.