Ole dinhmun a derthawng United hmabak Liverpool!

English football mai ni lo, khawvela club inhal ber pawl thlang dawn ila Manchester United leh Liverpool-in tlarhma an luah ngei ang - chutiang taka team inhal pahnih chu Pathianni zan dar 9:00 hian Premier League-ah an intawng dawn a, a hmuhnawm loh ring suh.

Club pahnih hi club lian tawka inngai ve ve an ni a, tun hnaia an inkar erawh a zau hle. United-in Sir Alex Ferguson hnuah lei rem an la rap hleithei lo a, Liverpool erawh Jurgen Klopp-a kaihhruainain Champions League leh league nomawi an chawi tawh.

Zanin an inkhelhna tur pawh Old Trafford ni mah se Liverpool-in rin an hlawh zawk a, chutihrual chuan Red Devils hian season hmasaa an neih loh Cristiano Ronaldo an neih tawh avangin beiseina an nei ang.

Hei mai a ni lo - United coach Ole Gunnar Solskjaer tan zanin inkhel hi a pawimawh lehzual dawn a, Norwegian coach hian mahni buzawlah Liverpool a ngam lo a nih chuan ban a ni dawn niin khawthlang media ten an sawi.

Ole mawlh hi
'Super substitute' tih hiala hming lem an pek ṭhin Ole Gunnar Solskjaer-a'n kum 2018 aṭangin United a enkawl ṭan a, Red Devils-ah hian player lakluh nan ringawt pound maktaduai 441 a seng tawh.

Mahse, player a nih laia United fachuam hian coach angin Old Trafford-ah hlawhtlinna a chhar thei lo a, pound maktaduai 400 chuang hian nomawi a hlawhchhuah sak lo.

Heti chung hian club legend leh club neitute thlawpna a dawng reng a, tun nipui transfer-ah pawh Jadon Sancho, Raphael Varane leh Cristiano Ronaldo a lalut thei a, a player neih sa enin ṭhatpui tham an ni.

Mahse, United hian an league match hnuhnung pathumah chak an nei lo a, Aston Villa (1-0) leh Leicester City (4-2) lakah tlawmin Everton (1-1) an inhnehtawkpui a, Champions League-a Atalanta (3-2) hneh turin Ronaldo ropuina an mamawh a, heng result aṭanga teh chuan zaninah Ole hi him tura rin a harsa.

Liverpool hi
Ole-a'n Liverpool hmachhawn a duh hun thlang dawn se, tun hi a tum chak loh lai tak a ni ngei ang - Reds hi khualmuala Atletico Madrid (3-2) hneh zo hlim an ni a, an phur vanglai tak a ni.

Jurgen Klopp-a'n, "Tunah chuan khawvela footballer ṭha ber a ni," a tih hial khawpin Mohamed Salah a tal ngap a, amah thlawp tura Sadio Mane, Roberto Firmino leh Diogo Jota an la awm leh zel avangin an chhe lo.

Mahse, ni e, mahse tih a ngai tlat. Virgil van Dijk a dam tawh chungin Liverpool tlarhnung a la nghet tawk lo a, goal khung uar viau mah se goal chhuah lamah an insum hleithei lo - league-ah goal 22 khung tawhin goal khung tam ber lawrlak an ni a, mahse, goal ruk an chhuah hi top four team-a goal chhuah hnem ber record a ni thung.

Liverpool tlarhnung a la nghet tawk lo tih a lang chiang a, United-in goal khung thiam bik Ronaldo an neih avangin Reds lakah goal khung ngei an beisei dawn. Mahse, United hi hliam vanga Bruno Fernandes chhawr thei lo dinhmunah an ding mek a, Portuguese midfielder khelh leh khelh loh hian thui takin United result a nghawng ang.

Goal khung thiam
Manchester United-in khaw-vela defender ṭha ber pawl Varane an nei tawh chungin tun season-a league match riat an khelhah goal 10 an chhuah tawh a, Liverpool-in league ringawtah goal 22 an khung tawh bawk.

Red Devils tlarhnung tan inven a ṭul dawn tihna a ni a, Premier League-a goal khung hnem ber team hian goal chhuah hnem United lakah goal khung an inthlahrung dawn lo.

Ole-a'n holding midfielder pahnih chhawr a rilruk ang tih a chiang a, chuti a nih chuan Scott McTominay leh Fred an lut ang - chuti a nih chuan Paul Pogba emaw Mason Greenwood emaw chu bench lamah an awm a rinawm.

Mahse, United hi an innghahna tur chu counter-attack a nih a rinawm a, chuti a nih chuan hnung lam aṭanga ball vawrh thei Pogba luh hi an mamawh - Pathianni zanah engkim a chiang dawn a, inkhel a hmuhnawm ang.