Inter mualah Juventus an lut dawn

Serie A season kal laia match hmuhnawm ber tura ngaih chu Pathianni zan dar 12:15 hian khelh a ni dawn. ‘Derby of Italy’tia an sawiah Inter Milan chuan Juventus an lo mikhual dawn a, inkhel hmuhnawm an chhawp chhuak ang.

Season dang ang chu ni se team pahnih inkhel tur hi hmahruaitu inchuhna emaw, champion tur zawk zawnna ang emaw a ni mai thei. Kuminah erawh an ṭhat dan berin an la khel rih lo, tun hnaiah erawh an insiamṭha tawh hle.

Juve an harh
Cristiano Ronaldo a chhuak a, manager thar Massimiliano Allegri nauten bul an ṭan fuh loh bawk avangin sawisel an hlawh nasa. Mahse, tunah chuan Old Lady hi an match hnuhnung parukah an chak vek - inrintawkna an nei sang leh tawh hle.

Juve tan Paulo Dybala a inlan theih a rinawm tawh, Argentina forward bakah hian striker Alvaro Morata chu bul ṭan thei turin a fit leh tawh bawk. Anni pahnih bakah hian Federico Chiesa an neih bawk avangin tlarhma lam chu an ngaihtuahawm lo ang.

Champions League-ah Leonardo Bonucci leh Matthijs de Ligt te an inkawp fuh a, lawmna tur a ni ang. Captain Giorgio Chiellini pawh inkhel turin a inpeih leh tawh bawk - coach Allegri tan player duhthlan tur tam hi thluak hman nawmna lam tak a ni dawn.

Inter an inpeih
Antonio Conte thlaktu Simone Inzaghi-a'n team nghet ṭha tak a din leh der tawh. Inter Milan hian Serie A match riat aṭangin goal 23 ngawt an khung thei, Italian football inelna sang berah hian anni aia goal khung hnem an awm lo.

Romelu Lukaku chhuah hnuah Lautaro Martinez thiamna a la tlahniam chuang lo a, tawnhriat nei ṭha Edin Dzeko an neih belh bawk. Inter tan goal neih tuma pawng tawng nawr ngawt erawh a fin thlak lo ang; Allegri naute hi counter attack hmang thiam an ni.

Inter Milan hi an chak lo a nih chuan Serie A nomawi humhim a harsa dawn, an chak a nih erawh chuan pahnihna AC Milan an hnaihchilh dawn. Juve hi an chak a nih erawh chuan Inter nih rualin season bul an ṭan fuh lohna lak aṭangin an tal chhuak felah a ngaih theih ang.