T20 Cricket World Cup ; India bul ṭanna tur Pakistan

Vawiin aṭangin T20 Cricket World Cup-ah a hmuhnawm chin 'Super 12' khelh ṭan a ni dawn a, cricket ngainatute tan inkhel hmuhnawm chhawpchhuah a ni dawn. Inkhel en châkawm zinga ngaihven hlawh ber tur chu Pathianni zan dar 7:30-a India leh Pakistan inkhel tur a ni.

Virat Kohli-a'n T20 World Cup zawhah T20 inelna bikah captain hna a bansan tur thu a sawi a, nomawi chawi chunga a hun tawp khar a duh dawn avangin Pakistan hneh chunga bul ṭan a pawimawh ang.

India an chungnung
India leh Pakistan inhalzia sawi nawn a ngai tawh lo a, ram pahnih boruak a ṭhat loh avangin ICC hnuaia inelna a nih loh chuan an inhmachhawn ta meuh lo.

Ram pahnih inhmachhawn hnuhnun ber chu Cricket World Cup 2019 (ODI) kha a ni a. June 16, 2019 khan India-in an hmelma hi 89 runs in an sawp.

T20 bikah phei chuan an intawn hnuhnun ber chu World Cup daih tawh kha a ni a, March 19, 2016 khan Kolkata-ah India-in wicket rukin an hneh.

India hi Pakistan lakah an chungnung a, T20 bikah vawi riat inhmachhawn tawhin vawi ruk an chak. Pakistan hi ṭum khat chauh an chak a, ṭum khat dangah an inhnehtawk.

Kohli-a hote
Virat Kohli kaihhruai team hi Indian Premier League khel zo hlim an nih avangin inelna hmachhawn turin an inpeih a, India aiawha tel pha chin an ṭhat ang bawkin thlan loh zingah hming langsar tak tak an intlar hnem hle.

World Cup khel tura inpuahchahnaah India hian England leh Australia te an hneh thei a, tun hma aṭanga Men in Blue lam ṭhatna batting lamin theihna an neih sanzia an pholang. KL Rahul, Rohit Sharma, Virat Kohli leh Rishabh Pant te hi chakpui tham an tling a, bowler lamah Jasprit Bumrah, Bhuveshwar Kumar, Mohammed Shami leh Ravichandra Ashwin te hi chapo pui tham an tling bawk.

Babar Azam-a hote
India hi ṭha viau mah se Pakistan hi vanduai theihna an ni a, Babar Azam-a captain-na hnuaia khel team hian World Cup ṭan hmain champion lai West Indies an hneh. Kum 27 mi Babar Azam hi khawvel batsman ṭha ber zinga mi a ni a, ODI ranking-ah pakhatna a nih bakah T20-ah phei chuan pakhatna a ni.

Babar Azam thlawp tur hian Mohammad Rizwan, Fakhar Zaman, Mohammad Hafeez leh Shoaib Malik te an awm a, bowling lamah pawh Shaheen Afridi an nei. Chutihrualin tun hmaa bowler nei ṭha ṭhin Pakistan hi bowling lamah an hniam lai tak tiin a sawi theih zawk.

Hriat tel tur erawh over 20 chauh an khel dawn a, player pakhat chet ṭhatin danglamna a thlen theih avangin India hi chak chiang saa dah a rem lo.

Group inṭhen dan
T20 World Cup hi first round, Super 12, semifinal leh final-ah ṭhen hran a ni a, kumin inelna hi India-a khelh tur ni mah se Covid-19 vangin UAE leh Oman-ah nghah a ni. First round-ah hian team pariat an inel a, group hnihah ṭhen niin pahnih ve vein team pariat awmsana Super 12 an zawm a, first round aṭanga tling team pali nen team 12 an awm.

Group 1-ah Australia, England, South Africa leh West Indies an awm sa a, first round-a group B pahnihna Bangladesh-in an belh tawh a, group A pakhatna (Sri Lanka) in an belh leh ang. Sri Lanka hi chhiarkawp danin pahnihna nih theih dan awm mah se match hniha an khelh tawhna aṭangin thilmak a thleng a nih loh chuan group hmahruaitu an ni dawn. First round-a team ṭha pahnih Lions leh Tigers te group 1-a an awm avangin he group aṭanga semifinal luh hi a harsa sawt dawn.

Group 2-ah India, New Zealand, Pakistan leh Afghanistan te an awm sa a, Scotland-in an belh tawh. Team parukna hi Ireland emaw Namibia emaw a nih dawn avangin group 2 hi group 1 aiin a awlsam zawk dawn a, Virat Kohli leh a hote tan semifinal thlen phak loh chu mualphona a ni thei ang.

Super 12-ah Scotland leh Bangladesh
Scotland chuan T20 World Cup Super 12 thleng turin Ningani zan khan Oman chu wicket riatin an hneh a, Bangaldesh-in first round paltlang turin Papua New Guinea chu 84 runs-in an sawp ve bawk.

Al Amerat Cricket Ground-ah Oman-in bat hmasak an thlang a, 20 overs-ah 122 runs siamin an thi vek. Scotland tan Kyle Coetzer (41), Richie Berrington (31*) leh Matthew Cross (26*) te an che ṭha a, over 17 lekah 123/2 runs siamin wicket riatin an chak. Coetzer-a hote hi match thum khelhah chak vekin group B hmahruaitu an ni.

Bangladesh-in Papua New Guinea lakah an theihna tak an lantir a, bat hmasak thlangin Mahmudullah (50), Shakib Al Hasan (46) leh Liton Das (29) te hmangin 181/7 runs an siam. Papua New Guinea tan an target hi umphak rual a ni lo a, over 19.3-ah 97 runs siamin an thi fai vek.

Tigers tan Shakib Al Hasan a che ṭha leh a, 46 runs a siam bakah run kua lek pein wicket li a la a, man of the match-ah thlan a ni. Nizan khan group A lamin group match an khel zo a, inkhel result kan hre hman lo.