Mizoram Journalists' Association (MJA) chuan nimin khan IPR Auditorium, Champhaiah general conference vawi 51-na an hmang a, an hun hmanpuitu MJA president hlui, Home minister K Sapdanga chuan Mizoram mamawh ber chu siamtharna (reformation) nia a hriat thu a sawi.

Home Minister chuan Mizoram mamawh ber siamtharna kawngah MJA member-te chu ṭan la tura chahin, "Khawtlang kal dan siamṭhat kawngahte, politics leh mipuite rilru sukthlek siamṭhat kawngahte chanchinbumite chu thawhhlawk thei ber turah ka ngai. Ziak ngeia dah thu chuan chungchuanna bik a nei a ni," a ti.

Thuthar thehdarhtute chu democracy sorkar lungphum palina an nih angin, sorkar fakna ziak kur nguai loa, a kal dan dik lote ziak a, fakseltu ṭha ni zel tura chahin K Sapdanga chuan, "Thuthar thehdarhtute hnen aṭanga sorkar fakselna ka hmuh hian ka lawm ṭhin a ni," a ti a, digital media chak tawh tak karah print/traditional media-te'n harsatna an tawk mek tih a hriatpui thu a sawi.

Home Minister chuan chanchinbu tichhuak a, soft copy tal pawha an chhuah ṭhin chu fakawm a tih thu sawiin, "Chanchinbu sem leh tih chhuah dan chu eng pawh ni se, a enkawltute ngaihtuahna leh thawhrimna lang ṭhin hi a ropui ber lai chu a ni. Print media-in hlutna leh tlona danglam bik tak a neih avangin, khawvelin ziaka dah ngei media hi a mamawh hun a thlen leh ngei ka beisei," a ti.

K Sapdanga chuan MJA chu pawl hlun leh pawimawh tak a nih thu sawiin, "Eizawnna hmanga khawtlang rawngbawltu leh sorkar khalh ngil ṭhin tute awmna a ni. MJA hruaitute kaihhruaina hnuaiah general conference vawi 51-na hial thleng theia a awm hi a ropui," a ti a, ze hloh miah loa hei chen an kal thei chu thil chhinchhiahtlak tak a nih thu a sawi.

MJA inkhawmpui hi vice president C Lalhmachhuana'n kaihruaiin, MJA president C Lalrambuatsaiha chuan MJA member-te chu teirei peihna leh insumtheihna nei turin a fuih.

Kum 2024-2025 chhunga an member nunna chan - Lalhmingmawia, Editor, Pasalṭha, Champhai; Johan Lalhmunmawia, DDK stringer, Lunglei; TC Lalmuankima, reporter, Akashvani Aizawl leh H Lalngaihawma, editor, Hnehtu, Aizawlte sunna hun hman niin, prominent journalist thar K Zothankhuma, editor, Virthli; T Lalhmachhuana, editor, Dingdi leh CS Chawngchhuma, editor, Hnamdamna te hnenah chawimawina pek an ni.

Chawhnu lamah MJA president C Lalrambuatsaiha kaihhruaina hnuaiah ro an rel a, zanriah an kilho nghal.