Hnahthial Police-in heroin hawng 39 an man

Hnahthial Police duty-te chuan nimin zing khan Khawhri khua leh Tuichang lei bulah heroin hawng 39 (gram 459.22) an man a, tualchhunga hralhna ang chuan Rs 13,77,660 man niin, hemi kaihhnawihah hian mi pali an man.

Sorkar thuchhuah tarlan danin, Khawhri khua Hnahthial Police-te heroin man hi gram 217.22 (hawng 17) niin, Rs 6,51,660 man hua chhût a ni. Ruihhlo hi Isak Lalhriatpuia (35) s/o Lalhmingliana, Farm Veng, Lunglei leh R Lallawmawma (21) s/o R Vanlalpeka, Ramthar, Lunglei-te hnen aṭanga man niin, an phurhna scooter (Ray Z) leh an mobile phone pawh an man nghal a ni.

Hnahthial Police-te hian Tuichang lei bulah Lalhunmawia (25) s/o Dawtchhunga, Saikuti Veng, Thingsai leh Lalhmangaihsanga (31) s/o Ricky-a, Ramthar Veng, Lungleite hnen aṭangin heroin gram 242 (hawng 22) an man a, tualchhunga hralhna ang chuan Rs 7,26,000 man a ni. Ruihhlo an phurhna Alto 800 leh an mobile phone an man tel bawk.

Hnahthial Police-te hian ruihhlo an man kaihhnawihah hian thubuai an ziaklut tawh a, an mi mante hi Lungleiah hruai an ni.