UPHC zawng zawnga damlo admit theih turin ruahmanna kalpui mek a ni - Health Minister

Health minister Lalrinpuii chuan upper primary health centre (UPHC) zawng zawngah damlo admit theih tura ruahmanna kalpui mek a nih thu a sawi.

March 25, Thawhlehni khan Champhai District Hospital chuan damdawi-in fai inelna ‘Kayakalp’ kum 2023 a lawmman pakhatna an dawn leh kum 2024 a lawmman pahnihna an dawn bakah kum 2023-a Eco Friendly Award-a lawmman pahnihna an dawn lawmna hun an buatsaih a, Health Minister hian a hmanpui a ni.

Lalrinpuii chuan Mizoram sorkarin a thil tum a tihlawhtling mek zel tih sawiin, "Mipui phurrit chhawk zangkhai turin ruang phurh man sorkarin a tum tawh a; hei bakah hian mipuiten man chawi loa damdawi-in a inenkawlna an dawn theihna tur - Mizoram Universal Health Care Scheme pawh Chief Minister-in a tlangzarh tawh a ni," a ti.

MUHCS hi state pawn damdawi-in 18 ten an rawn zawm tawh tih sawiin Health Minister chuan, "UPHC zawng zawngah damlo admit thei tura ruahmanna kalpui mek a ni. Thawktu indaih lohna phuhru turin nurse 300 lakna tur advertisement tihchhuah a ni tawh," a ti a, district hospital tinah mipuite lo chhawn tu tur public relations officer leh health care scheme mumal taka a kal theihna turin data manager pawh lak an nih dawn thu a sawi.

Health Minister chuan Mizoram sorkar hnuaia ICU function lo zawng zawng function tura hmalak mek a nih thu sawiin, "Rampum huapa specialist doctor indaih lohna phuhru turin specialist pakua lakna tur advertisement tihchhuah a ni. ZMCH-ah cabin 30 function tir tum a ni a, open heart surgery kalpui thei tura ruahmanna kalpui mek a ni," a ti.

Champhai District Hospital-ah an lawmman dawnte an lawmna hun hi Champhai South bialtu MLA Lt. Col. Clement Lalhmingthanga leh Champhai North bialtu MLA H Ginzalalate pawhin an hmanpui.

Kayakalp hi sorkar laipuiin India ram faina tura hma a lakna Swachh Bharat Abhiyaan hnuaia mi niin, sorkar damdawi-in leh a velte fai taka vawn a nih theih nan Health & Family Welfare department hnuaiah kum 2015 aṭangin kalpui a ni. He scheme-in a tum ber chu sorkar damdawi-inten damlote hnena enkawlna ṭha zawk (Quality Health Care Service Delivery) an pek hi a ni.