Minister-in Eco Fest 2025 a hmanpui

Environment Forest & Climate Change (EFCC) minister Lalthansanga chuan March 26, Thawhlehni khan Mamit district-a Dampa Tiger Reserve-ah Eco Fest 2025 a hmanpui a; Orchidarium & RET Plant Conservatory lungphum a phum bakah Jungle Safarai core zone-I leh II a hawng nghal.

Lalthansanga chuan, tunlaiah silai hmanga pasalṭha ni tawh loin, camera hmanga pasalṭha nih a ṭul tawh zawk thu a sawi a, "Dampa Tiger Reserve venghim turin kan zavaiin mawhphurhna kan nei a, hlen ngei a theihtawp chhuah a ṭul. Sorkar chuan ramsa, rannung, thing leh mau humhalh nan 'online complain portal' siam a tum a, theihtawpin hma a la mek. Hetah hian hming lang lo (anonymous)-a complaint thehluh theih tura ruahman a ni," a ti.

Dan bawhchhetute chu hrem an nih tur thu sawin EFCC Minister chuan, "Kan nungchate kan humhalhna kawngah hian Forest department mai ni lo, kan YMA te an pawimawh em em a ni," a ti a, thawhhona ṭha neih turm zel turin kalkhawmte a chah.

He hunah hian Principal Chief Conservator of Forest, Chief Wildlife Warden bakah official dangte an tel a; photography competition-a tiṭhate hnenah lawmman sem a ni bawk.