KHAWTHLIR

Free clinic

Project – How Are You (HAY), Cod Nerc NGO chuan March 25, Thawhlehni khan Hnam Ro Chawisang Pawl Building, Dawrpui Jail Vengah HAY project hnuaia inziaklut, HAY chhungkuate tan a thlawna inentirna (free clinic) an buatsaih a, a thlawnin damdawi an sem nghal.

Minister-in hmanpui

Airport Group MHIP chuan nimin khan Hmunpui khuaah khawmpui an hmang a, minister of state B Lalchhanzova'n a hmanpui. B Lalchhanzova chuan changkanna hi phak baka nun leh tlin loh anga lan hi a ni lo tih sawiin, "Mahni khawsakin a phak ang zela nun ngamna hi a ni a, hmasawn tura hmalam pan tur kan nih rualin tlin loh leh phak loh anga nun tum hi chhungkaw tan a pawi em em a ni," a ti.

Chetsualnaah thi

Lalchhuangzela (23) s/o H Lalremliana (L), Thinglian khua chu a hnathawhna Aibawk leh Sabual inkar kawngah hitachi-in a chesual a, kawngthlangah lumin, chetsualna hmunah hian a thi a ni.

Viksit Bharat

Mizoram Youth Commission (MYC) chairman Malsawmzuala Ralte chuan nimin khan Vaivakawn Cultural Centre cum Auditorium-ah Sports & Youths Services department bultuma buatsaih Viksit Bharat State Level National Youth Parliament a hawng. Malsawmzuala Ralte chuan, zirlaite chu thawhrimna nena an thil tih apiangah theihtawp chhuah ṭhin turin a fuih.

Ruihhlo ṭhat lohzia inzirtir

Kanan Branch YMA Kumpuan Sub Committee chuan March 25, Thawhlehni zan khan Kanan Presbyterian Kohhran Hall-ah an veng chhunga kum 15 aṭanga 18 inkarte tan ruihhlo ṭhat lohzia inzirtirna an buatsaih a, bialtu MLA Lalnghinglova Hmar, Excise minister-in a hmanpui. Excise Minister chuan ruihhlo ti chhin miah lo turin kalkhawmte a fuih. He hunah mi 176 chuang an kalkhawm a, ruihhlo ti lo turin an intiam.