PoSH Act, 2023 zirhona buatsaih

Mizoram State Legal Services Authority leh Women & Child Development ṭangkawp chuan nimin khan Dawrpui Multipurpose Centre-ah sorkar department hrang hrang aiawh leh private business-te pualin hnathawhna hmuna hmeichhiate chunga mipat hmeichhiatna lam hawia chetna chungchangah PoSH Act, 2023 (Prevention, Prohibition and Redressal) dan leh a kaihhnawih inzirtirna an buatsaih a; Gauhati High Court judge Justice Nelson Sailo-in a hmanpui.

Justice Nelson Sailo chuan, PoSH Act chu hmeichhiate dikna leh zahawmna humhim nan ṭangkai taka hman a nih ṭhin thu a sawi a, "Dan hriat loh avanga a mamawh tak takte ngawi renga tuartu an nih mai loh nan training hlawkthlak tak in hman a, in hnathawhna hmun ṭheuhah midang hrilhhretu ni ṭheuh ang che u," a ti.

Tarlan danin, hnathawhna hmunah mipat hmeichhiatna rawngkaia hmeichhiate zahawmna ti bawrhbang thei zawnga thusawi emaw, kutthlak emaw a awm loh a, ngaihngam taka hna an thawh theih nan sorkar leh private office-ahte thawktu 10 aia tam awmnaah chuan Internal Complaint Committee/Local Complaint Committee din tur a ni a; complaint lut a awm chuan an chungthu uluk taka lo ngaihven in, hma lo lak chu an hna a ni.

Training hi Women & Child Development director Zoramthangi Chhangte-in a kaihruai a; advocate Lalfamkimi, T Lalnunsiama leh Flora Lalṭanpuii ten thil pawimawhte an zirtir a ni.