Dungtlangah lungphun chi thum an hawng

Nimin khan Dungtlang khuaah Ar & Culture minister C Lalsawivunga hoin Thangchhuah Lungphun, Lianchhiari Lungphun leh Pasaltṭa Lalhmingliana Lungphun hawn a ni.

Thangchhuah lung hi chief minister Lalduhoma, chief minister hlui Zoramthanga, minister Lalrinpuii, MPSC chairman hlui B Sangkhumi, Padma Shri; Mizo zinga Mount Everest lawn chhuak hmasa ber David Zohmangaiha leh Youth Olympics gold medalist, weightlifter Jeremy Lalrinnungate hmingin an phun.

Art & Culture Minister chuan kan hnam nunphung leh chindante hi kan humhalh zel a ngaih thu sawiin, "Hawihhawmnate, tlawngaihnate leh aia upa zahna kawngahte puanven kan sawichhin zel a ṭul hle. Hnam changkang apiangin an pipute sulhnu leh hmunhmate an ngaihluin an humhalh ṭhin a, keini Zofate pawhin kan pipute nun ze mawi leh sulhnute kan ngaihlut zel hi a ṭul hle a ni. Helai hmun hi khualzin mite tana hmun hlu zawk a nih zel theih nan sorkar pawhin hma kan la zel dawn," a ti.

Health minister Lalrinpuii pawhin thu sawiin, "Mizoram sorkar chuan universal health care a kalpui dawn ta a, Dungtlang leh a chhehvel khua te pawhin lo ngaihven turin kan sawm che u. Hriselna kawngah hmachhawp thar tam tak kan nei mek a ni. Heng Sorkar hmalaknate hi ngaihven a mipuiten a zar in zo ngei hi kan duh ber. Tourism lamah pawh he tlangdung hian hma in lak zel ka duh," a ti a, pipu sulhnu leh hmunhlui an neihte humhalha vawng him zel turin Dungtlang mipuite a chah.

Lungphun hawn inkhawm hi Pipu Sulhnu Humhalhtu Pawl Organising Committee buatsaih niin kum 1997 khan mi 52 te thangchhuah lung an lo phun tawh a, nimina hawn tak mi parukte nen helai hmuna thangchhuah lung phunte hi mi 58 an tling tawh. Organising committe chuan Mizo hnam tana mi hming ṭhate tan he thangchhuah lung hi phun zel an tum.