LADC chairman atan T Zakunga thlang

Lai Autonomous District Council (LADC) chairman atan Vawmbuk bialtu MDC T Zakunga nimin khan chuhtu awm loa thlan a ni.

LADC chairman thlanna hun hi LADC Session hall-ah protem chairman C Biakthansangi kaihhruaina hnuaiah thlak a ni a, T Zakunga chiah hian nomination a file avangin chuhtu awm loa tlinga puan a ni.

T Zakunga chuan LADC chairman dinhmun a chelh ve thei chu an lawmthu sawiin, "He kan ram rorelna pawimawh takah hian kan ram leh hnam tan ro kan rel ho dawn a ni a, dan hnuaiah chuan member-te kan intluk tlan vek avangin member-te'n dan hnuaiah zalen takin ro kan rel ho ṭhin dawn. A ṭul ang zel kan in finchhuah zel pawh ka beisei a ni," a ti.

LADC chairman VL Hmuaka leh dy. chairman H Lalmuansangate chuan March 19, 2025 khan an nihna aṭanga banna an thehlut a, LADC chu chairman leh dy. chairman nei loin a awm a ni. Governor chuan protem chairman atan C Biakthangi ruatin, ani kaihhruaina hnuaiah hian chairman hi thlan a ni ta a ni.