Treasury Bazar kâng taah Bazar awm tawh lo se duh

Aizawl Hmathlir Pawl (AHP) chuan Aizawl Municipal Corporation (AMC) Commissioner hnenah lehkhathawnin, Treasury Bazar kangtaah bazar awm tawh lose an duhthu an tarlang.

AHP chuan Treasury Bazar kang kha vanduaithlak an tih thu tarlangin, "Kangmei avanga sum tam tak chante kan khawngaih leh kan tuarpui em em rualin helai hmun hi Aizawl hmun pawimawh ber lai, kan ram rorelna inpui ber nena inhne reng, mawi leh zahawm taka buatsaih a ṭul em em na hmun a nih avangin kangmei tuarte inzawrhna tur hmun dang ngaihtuahsakin, he lai hmunah hian bazar hi awm tawh lo se kan lo ti ve hle," a ti.

Vanduaina a lo thlen hnua AMC-ten vanduaina tawkte hrethiam tak chunga an inzawrh leh zelna tur buatsaihsak lawmawm an tih thu tarlangin AHP chuan, "Kangmei chhuahna lai hmun pawh zahawm leh thianghlim taka vawn zui a, mipui veivakte kal velna atan buatsaih zui a tum thu kan hriat khan kan thlawpin kan lo lawm ve hle a ni," an ti a, AMC thil tum chu social media leh chanchinbu lama mipui ngaihdan tam ber pawh a nih thu an tarlang.

AHP chuan sorkar hmalakna zawma kangmei tuartute pawhin thuawih taka bazar thar tur AMC Multi Complex-a an insuan luh mek laia Venghlui Local Council leh All NGO Venghluiten AMC thu chhuak kalh zawnga bazar tur an sa lui pawi an tih thu tarlangin, "He an thiltih hi tih tawp a nih theihna tura Venghlui LC hnena AMC Commissioner lehkha hmanga hriattirna i chhuah hi kan thlawp tlat. He indinnaah hian nghet taka indin tlang ngei pawh kan beisei e," an ti.