GAD changtu chief minister Lalduhoma chuan Lengpui Airport kalpui zel dan tur ngaihtuahtu tur Adviser to CM (Planning) kaihhruai working committee din a nih thu leh, airport ram chhungah mimal ram nei an tam thu nimin Assembly Session-ah House a hrilh.

MNF member Lalrinsanga Ralte zawhna chhangin Chief Minister chuan, "Sorkar tharah hi chuan Lengpui Airport hi bungraw phur service theihna tura a hranpa-a ruahmanna a la awm rih lo. Enzui chhoh vat tum a ni. Bungraw phur thlawhtheihna service theih tir kan ngai pawimawh a, kan policy-ah pawh kan telh. Kan thlai tharte man tlawm zawka thlawhtheihna hmanga thawn chhuah a, market ṭha zawk neih kan duh," a ti.

Chief Minister sawi danin, MNF kaihhruai sorkar pawh khan Lengpui Airport-a bungraw phur thlawhtheihna service tir a ngai pawimawh a, a hmunhma siamna tur pawh SASCI-ah dah a ni. Mah se, sanction a nih hnuah telh a ni loa, sum ber a awm loh chuan tih theih a ni ta lo.

Lengpui Aiport chuan sum lalut ve bawk mah se, a senso tawh nena chhûtin an hek tih sawiin Lalduhoma chuan, "Kan senso leh tur chhât phei chuan kan zo lo. State dang pawhin an pualin airport an nei duh tawh lo. A pachhe berin ui beh tlat hi kan economy ngaihtuahin tihchi a ni lo. Chuvangin, kan airport kan kalpui zel dan tur ngaihtuahtu tur Adviser to CM (Planning) kaihhruaina hnuaiah working committee din a ni," a ti.

Chief Minister chuan, working committee-chu May 3, 2024 hmaa an report thehlut tura tih an nih thu sawiin, "Committee hian kan sensoin airport kan la cheibawl zui zel dawn nge, AAI hnenah kan hlan dawn nge, private-ah kan hlan dawn nge, airforce-ah kan hlan dawn tihte an dawr kual ang. An report thehluh hunah aiprort kalpui zel dan turah thutlukna siam a ni ang," a ti a, report an thehluh hma chuan airport kalpui zel dan tur chhân theih a nih loh thu a sawi.

Lengpui Airport ram mimalin an lo nei nasa tih sawiin Lalduhoma chuan, "Mi thil ti theite'n LSC an nei thluah tawh. Revenue dept. lam buai hle mah se, airport ram chin survey tura tih an ni. An survey zawh veleh a ram chin kan hung ang. Khingtu pawh kan ngah viau thei. Dik lo taka ram inpekin lu a ti hai em em, inhlan chhâwn lehzelna turah pawh kan lu a ti hai a ni. Midang kuta pek dawn chuan ram chin tihfel a ngai," a ti.

Lalduhoma chuan Mizoramin helicopter service a neih mek chu Pawans Hans a nih thu sawiin, "Helicopter service hi kan khawpkham lo a, Sky One Private Ltd. nen kan inbe mek a, rem thei turah kan ngai. Sorkar hian helicopter service-ah hian kan hloh char char a, hloh lo turin siam dawn ila mirethei zawk leh damloten an ban phak dawn si lo. Mipui tan chuan kan insengso tur a lawm tiin kan insengso mek zel," a ti a, regional connectivity scheme hnuaiah heliport 11 leh helipad 15 siam belh tum mek a nih thu a sawi.