ZPM an sorkar hnuah silai licence Home dept.-in an la pe chhuak lo

Home minister K Sapdanga chuan ZPM member Baryl Vanneihsangi zawhna chhangin, sorkar thar a din hnuah Home department-in silai licence pek chhuah a la neih loh thu House a hrilh.

K Sapdanga chuan silai licence chungchanga mawhphurtu an nihna thla thum chauh a la nih thu sawiin, "Silai ralthuam a nih avangin a licence hi uluk taka pek a ngai. Hriatchian mang loh pek ṭha kan ti lo," a ti.

Home Minister sawi danin, silai licence hi kum 2022 ah 1,053 leh kum 2023 ah 1,296 pek chhuah a ni. Inthlan dawn kumah vote zawnna atana hman ang deuha sawite a awm.

Mi ṭhenkhatin silai licence dilin, silai lei chuang loin a licence an zawrh thu sawiin K Sapdanga chuan, "Hetiang a nih laia licence lo pek chhuah zung zung hi ṭha kan ti lo. Hengte hi chinfel phawt ṭha kan ti," a ti.

Home Minister chuan mahni invenna atan leh an thlai venna atana silai mamawh tak tak an awm thu leh, a mamawh tak takte hnenah chuan licence pek chhuah an tum thu a sawi.

BJP member Dr K Beichhua zawhna Home Minister-in a chhan danin, Siaha District Jail Superintendent Office sak ṭhat tum a ni. Siaha District Jail fencing metre 165 hung zawh tawh a ni a, hemi atan hian cheng nuai 100 sen a ni.

K Sapdanga chuan ZPM member Jeje Lalpekhlua zawhna chhangin, Home department hnuaiah zu kaihhnawih avanga thi leh hna zawm mumal thei lote chhinchhiahna data siam a ni lo.