World Hearing Day pualin hun hmang

National Health Mission hnuaia National Programme for Prevention and Control of Deafness (NPPCD) chuan nimin khan Aizawl Press Club-ah MJA member-te World Hearing Day pualin hun an hmanpui a, Persons with Disability (PwD) commissioner Vanlaldiki Sailo chu khuallian a ni.

Vanlaldiki Sailo chuan thuthar thehdarhtute chu rualbanlote’n an dikna chanvo an chan theihna tur puangzar tu pawimawh tak an nih thu sawiin, "Bengngawngte chu an hmel ena hriat mai theih an nih loh avangin hrethiamtu an nei lo fo ṭhin. Khawngaihtu aiin hrethiamtu an mamawh em em a ni," a ti.

PwD Commissioner sawi danin, ri hre thei lote tan pui­punna leh hun pawimawhah chuan sign language thiam (interpreter)-te pawh an awm ngei a ṭul.

Civil Hospital, Aizawla ENT surgeon Dr Lalramnghaki chuan kumin World Hearing Day thupui 'Changing Mindset: Let’s Make Ear and Hearing Care a Reality for All' tih a sawi zau.

Dr Lalramnghaki chuan, bengngawngte chunga ngaihdan thlak a ṭul thu sawiin, "Mi pangngai anga kan en a pawimawh em em a ni. Kan ngaihdan thlak satliah mai ni loin, hriatna hloh hi major health issue a nih zia kan hriat thar a pawimawh hle," a ti.

NPPCD state nodal officer Dr Robert L Khawlhring chuan NPPCD thil tumte sawiin, "NPPCD hi beng ri hriatna lama hre thei lote puihna tura programme duan a ni," a ti a, naupiang hlim thlengin an beng a ṭha nge ṭha lo tih én theihna neih a nih tawh thu a sawi.

Civil Hospital, Aizawlin a chhinchhiah danin, Mizoramah rualbanlo mi 2,792 awmin, chu'ng zinga mi 1,926-te chu beng­ngawng an ni. Aizawl bikah hian beng­ngawng mi 873 an awm.