MP thusawi thei ringawt ni lo, thil ti thei tur kan mamawh MBJP President

BJP Mizoram chuan Lok Sabha MP inthlanpui lo awm tur atan nimin khan Tuivamit, Ramrikawnah Street Campaign an chhunzawm a; MBJP president Vanlalhmuaka chuan, MP thusawi thei ringawt ni lo, MP thil ti thei tur Mizoramin a mamawh thu a sawi.

Vanlalhmuaka chuan, Mizoram sorkarin ṭha taka hna a thawh theihna turin an mahni puitu tur leh mamawh hrang hrang central aṭanga sawichhuahpuitu tur Mizoramin a mamawh thu a sawi a, "Central thisen zawmpui kan mamawh a ni. Kan political party nihna te, NGO-a kan nihnate dahṭha a, kan ram kan hnam ngaihtuah chunga MP thusawi thei ringawt ni lo, MP thil ti thei nei turin BJP MP kan mamawh a ni," a ti.

Mahni aia fing zawk bum tum chu sim a ngaih thu sawiin Vanlalhmuaka chuan, "BJP kan duh lo emaw, kan zawm duh lo a nih chuan central lam khuan min thlir reng avangin kan state sorkar hruaitute zin hian, sapui an rawn hawn ngai dawn lo. Ṭawngkam ṭha leh thlum bak hawn tur an nei dawn lo. Mahni aia fing zawk bum tum hi kan sim a ngai a ni," a ti.

MBJP President chuan, Mizoram hian mahnia thawhchhuah leh intodelh theihna a la neih loh avangin central puihna a mamawh tih sawiin, "Chuvangin MP election kan hmalawka kan neih turah hian Mizoramin BJP MP kan neih a ṭul hle," a ti a; MP inthlanah BJP MP thlan a nih loha, Mizoram sorkarin sum leh paiah harsatna a tawk a nih chuan mipuite mawh a nih tur thu a sawi.