Kan dept.-ah inrelbawlna ṭha thei ang ber siam kan tum - LRS Minister

Land Revenue & Settlement (LRS) minister B Lalchhanzova chuan an department-ah inrelbawlna ṭha thei ang ber siam an tum thu nimin Assembly Session-ah House a hrilh.

ZPM member H Ginzalala zawha kal zela zawhbelhnate chhangin B Lalchhanzova chuan, rambuai a awm nasat chhan chu department leh mipui inkarah kak a awm rei lutuk tih dept. official-te'n an hrilh tih sawiin, "Rambuai tam tak ngaihtuah lohin a awm rei. Chuvangin inrelbawlna ṭha thei ang ber siam kan tum a, ruahmanna kalpui mek a ni," a ti.

LRS Minister chuan an dept.-ah surveyor post 139 a awm thu sawiin, "Surveyor post hi 64 hnawhkhah niin, hnawhkhah loh 75 a awm. Indaih lohna a nasa a, mipui manganna hriaiin out source-a agency rawih kan tum. Anni hian ram an teh ang a, dept. lamin uluk takin an thlifim zel dawn," a ti a, survey firm empanelment buaipui mek a nih thu a sawi.

MNF member Lalchhan­dama Ralte zawhna chhangin B Lalchhanzova chuan, "Mizoram sorkarin progressive tax kalpui turin ngaihtuahna a hmang mek. Tun dinhmunah hman ṭan hun tur sawi theih a ni lo," a ti.