KHAWTHLIR

PYD-in thisen pe

Nimin khan PYD (NEI) Kawnpui Bial chuan Kawnpuia UPC kohhran sunday school hall-ah thisen pek an huaihawt a, Kolasib District Hospital tan thisen unit 35 pein, petute hmeichhia 18 leh mipa 17 an ni. PYD (NEI), Aibawk Bial pawhin ZMC tan thisen unit 28 an pe a, petute mipa 21 leh hmeichhia pasarih an ni.

Hmalak tum

MNF member K Laldawngliana zawhna chhangin Commerce & Industries minister F Rodingliana chuan, a theih ang anga sumdawnna tihmasawn turin sorkarin hmalak a tum thu House a hrilh.

MPYCC-in chhuang

Mizoram Pradesh Youth Congress Committee (MPYCC) chuan Delhi Police-a Mizo nula PC Vanlalruati'n tun hnaia pistol nena mipui rikrapna hmuna mipui thlavang hauha huaisen taka buaina a chingfel chu an chhuan thu an tarlang a; "March 1, 2024 zan dar 8:40 khan Hauz Khas Village, New Delhi-ah hnamdang zurui pakhatin pistol nen mipui a rikrapna hmuna Delhi Police-a Mizo nula chhuanawm PC Vanlalruati'n mipui thlavang hauha huaisen taka buaina a ching fel hi kan chhuang takzet a ni," an ti.

LMC parking zone

Lunglei Municipal Council (LMC) chief executive officer Donny Lalruatsanga leh Lunglei Traffic hotute chuan nimin khan LMC chhunga lirthei dahna (parking) chungchangah felfai leh mumal zawka parking area siam dan tur an enfiah. Parking zone atan hian Chanmari Children Park bul aṭanga enfiah ṭanin Venglaia Police Station chhak thleng an enfiah. LMC-a parking zone hrang hrangte hi tunkar chhunga enfiaha, teh ṭhat zawh hman tum a ni.

Police post ruak 4,268

ZPM member Lalchhuanthanga zawhna chhangin Home minister K Sapdanga chuan, Home department hnuaiah police post ruak 4,268 a awm thu House a hrilh a, "Post ruakte hi hnawhkhah tuma hmalak mek a ni," a ti.