Inkaichhawn theih loh natnaa hmalak dan tur rêl

Lunglei District Health Society hnuaia Sub-Committee on Non-Communicable Diseases (NCD) chu an chairman James Miahlung, additional DC kaihhruaiin nimin khan an ṭhukhawm a; NCD (inkaichhawn theih loh natna) awareness campaign leh screening test beihpui thlak dan tur an sawiho.

Ṭhukhawm chuan hmalakna pakhat atan Old Tennis Court-ah March 11, 2024 zing dar 7 khian ‘Healthy Lunglei Campaign’ hawn/tlangzarh ni se, tlangzarh turin Health Minister sawm ni se, an ti.

Kohhran Fellowship hrang hrang kaltlanga hmalak dan tur te, vantlang mipui zinga hmalak dan tur te, higher secondary school leh college zirlaite hnena hmalak dan tur te, MUP leh MHIP zinga hmalak dan tur te, electronic media kaltlanga hmalak dan tur te, YMA/Kohhran ṭhalai member-te zinga fitness/ hriselna chungchang survey neih dan turte an rêl a; brand ambassador turte an ruat nghal bawk.