MZP-in college asst. prof. lak dan ennawn turin sorkar an ngen

Mizo Zirlai Pawl (MZP) General Headquarters extended OB chuan nimin khan MZP pisa-ah an president H Lalthianghlima kaihhruaiin tunhnaia college assistant professor lak dana thil felhlel awm nia an hriat chungchang an sawiho a; a thiam apiang an luh theihna tura hma la turin sorkar an ngen.

MZP chuan, Mizoram college hrang hranga thawk tur assistant professor lâk kalpui ṭhin dan chu duhsak zawngte thun theihna remchang kawng zau tak hawnna nia an hriat thu an tarlang a, "A kalphung (system) hrim hrim pawh siamṭhat ni se kan duh a, ngun taka ngaihtuahna senga ennawn tur leh a thiam apiang an luh theihna turin thuneitute kan ngen nghal a ni," an ti.

Pawl 10 exam hmachhawn lai, hmaituam tu tih hriat lohin chemtea a puma a vit chu pawi an tih thu tarlangin MZP chuan, "Hetiang thil duhawm lo hi thleng nawn tawh lo se kan duh tak zet. Zirlai chunga pawi khawihtu hi a rang thei ang bera man chhuak a, a phu tawk hremna pe ngei turin thuneitute kan ngen nghal bawk a ni," an ti a; MZP chuan zirlai chhiattawk hi a tawrhpui zia lantir nan an kan.