MNF National Day hman a ni; Hruaitu thar an puang nghal

Mizo National Day vawi 58-na chu nimin khan Mizo Hnam Rûnah hman niin, MNF General Hqrs. elected office bearers thlan tharte puan chhuahna hun hman nghal a ni. MNF president Zoramthanga chuan, "MNF chu Pathian hruainain a tho kâng leh ṭhin," a ti.

Zoramthanga chuan, Mizo hnam nationalism chu thisena baptist tawh a nih thu a sawi a, "Chu nationalism kengtu chu MNF Party a ni. Party dang ang kan ni lo a, Pathian leh kan ram tan, tia kan din tlatna hi kan felnaah Pathianin a ruat," a ti a, MNF chuan hniam lai nei mah se, Pathian hruainain a tho kâng leh ṭhin niin a sawi.

MNF chu Laldenga emaw, Zoramthanga emaw awihnun a nih loh thu sawiin MNF President chuan, "Mizo hnamte hi khawvel hnam tin zinga Krista chanchin ṭha hril tura koh kan ni a, chumi tura he ram leh he hnam buatsaih hi MNF dinchhan leh tum bulpui ber a ni. Mizo Union te, PC Party-te an lo ral tawh a, Congress pawh an hniam ta hle. MNF erawh kum 60 chuang Pathianin hun harsa leh khirh tak karah pawh a hruai zel," a ti.

Zoramthanga chuan ZPM pawh hnatlang party an nih thu sawiin, "Belkeh phuarkhawm ang mai an ni a, an kehdarh chu a nasa viau ang," a ti.

He hun hi MNF senior vice president kalchhuak tur Tawnluia'n a kaihruai a; MNF general election returning officer Dr Zoramdinthara chuan kum 2024 - 2027 MNF General Hqrs. hruaitu (elected OB)-te a puang. MNF hruaitu tharte chu president Zoramthanga, sr. vice president Dr R Lalthangliana, vice president Vanlalzawma leh Lalchhamdama Ralte leh, treasurer Lalruatkima te an ni.

Mizo National Day hi zing karah pawh Tawnluia hoin zalenna a puanna hmun (C Rochhinga in kawt)-ah hman a ni.

Tawnluia chuan, MNF hruaitu hmasate kha an huaisen hle tih sawiin, "An theihna leh finna, an ralthuam leh sum leh pai an in en a, engmah an ni lo tih an inhria. Pathian chakna leh humhimnaa innghatin an zahawmna leh an thâ leh zung, sum leh paite chu dahkhamin zalenna an puang a ni," a ti a, MNF chu an ni pawimawh tel loin an MNF theih loh thu a sawi.