Ram pawn aṭanga kuhva rah rawn lut ṭhinah kan zavaia ṭan tlàn a ngai - Home Minister

Home minister K Sapdanga chuan ram pawn aṭanga kuhva rah rawn lut ṭhin chu ram chhunga kuhva thar ti khaw lo thei a nih avangin ṭan tlan a ngaih thu a sawi.

Nimin Assembly session-ah MNF member Lalrinsanga Ralte zawhna chhangin Home Minister chuan, "Kuhva rah hi a lang pawhin, a rûk pawhin sorkarin a buaipui. Sorkar ai mahin mipuiin an buaipui zawk a, kan thu a rual tlâng. A chêp sawt ta hle mai, khawi khawiah emaw hian chhekkhawl a awm nual niin a hriat. Engtik hun laia chhekkhawl kha nge a nih, zalen hun riau lai a lo awm emaw ni?" a ti.

Home Minister chuan, sorkar thar pian hnuah police checkgate reng rengah foreign kuhva a kaltlang tur a ni lo tih thupek a awm thu sawiin, "Police pawhin an zawm ṭha hle niin kan hria. Duty lohna hmunah chuan kawng rûk a awm zung zung an ti. Chuvang chuan kuhva hi a rêm hlei thei lo," a ti a, a changin khawtlangin, a changin police-in an man ṭhin thu a sawi.

Kuhva chu lu tihai tham buaipui tur a awm reng tih sawiin K Sapdanga chuan, "Mizoram chhungah kuhva rah hmanga eizawng mi 10,000 chuang an awm, anni nena remruat ho dan kan ngaihven mek zel. Mizoram chhunga kut hnathawktuten harsatna an tawh loh theih dan bera a remchan ang anga buaipui mek a ni," a ti.

Home Minister chuan ruling an ni emaw, opposition an ni emaw, sorkar hnathawk an ni emaw, kut hnathawktu an ni emaw foreign kuhva rah chuan Mizoram chhunga kuhva thar a tih khaw loh theih avangin ṭanho a ngaih thu sawiin, House member-te foreign kuhva rah do kawngah theihtawp chhuahpuiah a sawm.