Aizawl khawpui lailia Assam Rifles awmna huam chhungah ram (land pass) nei mi 50 an awm mek a, chu'ng mite ram neih belh khawm zau zawng chu square metre 31,406.62 a tling. Land pass nei zinga pathum chu MLA hlui an ni.

Land Revenue & Settlement (LRS) department-in RTI Act hmanga zawhna chhángin, Aizawl khawpui lailia Assam Rifles awmna huam chhungah mimal ram nei an awm thu a tarlang a, "Mimal ram nei zawng zawng hian an pass neih angte GIS map-ah an update vek lo a, kan hriat theih angte tarlan a ni," an ti.

RTI Act hmanga zawhna LRS department SPIO-in August 30, 2022-a a chhàn danin, Lammual leh a chhehvela Assam Rifles ram chhunga mimal ram nei mi 50 zinga pathum chu Mizoram MLA hlui an ni a; Public Health Engineering (PHE) department, Bethlehem Venga primary school pakhat leh village council pahnihte'n land pass an nei bawk.

Land pass nei 50 zinga pathum chu an address tarlan a ni lo a, a bak 47 zinga 42 chu Aizawl Municipal Corpaoration huam chhunga mite an ni. Mizoram sorkarin AR Lammual huam chhunga mimal ram neite tihtawp/cancel sak a tum leh tum loh zawhna chu, 'Sorkarin tihtawp/cancel sak a tum leh tum loh hi Directorate (LRS) aṭang chuan a hriat theih loh a ni,' tiin SPIO chuan a chháng.

LRS department-in land pass list a tarlante chu kum 1970 aṭanga 2006 chhunga land pass pek chhuahte a ni a, chu'ng zinga pali chu sorkar department, sikul leh VC hminga pek a ni.

PHE department chuan ram (land pass) sq.m. 5,481.8-a zau neiin, ram nei zau ber an ni a; mimal zinga land pass nei zau ber Ramprasad, Bethlehem Veng chuan sq.m. 1,577.9-a zau a nei a, ram nei zím ber C Lalbiakliana, Chhinga Veng chuan sq.m. 32.21-a zau a nei bawk.