MLA 30 nei turin kan inbuatsaih - MNF President

MNF president Zoram­thanga chuan, an party chu MLA an neih mek 28 aṭangin inthlan lo awm leh turah chuan MLA 30 chuang nei turin an inbuatsaih mek tih a sawi.

September 3, Inrinnia a bial chhung, Muthi khuaa an party zawm tharte a lawmnaah thu sawiin Zoramthanga chuan, kum 2023 inthlanpui lo awm turah Pathian leh mipui zarah varparh arsi a êng zual zel dawn niin a sawi a, "MLA 28 aṭangin MLA 30 chuang nei turin kan inbuatsaih. Kum 60 chuang min lo kaihruai tawhtu hian kawng lakah min kalsan ka ring lo," a ti.

Zoramthanga chuan, kum 1961 aṭangin MNF a kal zel a, chhiatna, hun hlauhawm leh harsa tak takah pawh Pathianin a humhim zel nia sawiin, "Tunah pawh hripui léngin kum hnih chhung min tiṭhuanawp a, ram pumah vawk hriin min nuai a, kan ṭhenawm unau ráltlânte'n min chên chilh bawk," a ti a; Mizoram budget cheng vbc. 3,000 chuang hmuh a nih loh thu a sawi.

MNF President chuan, harsatna hrang hrang hmachhawn a nih laiin Pathian kaihhruaina leh malsawmna an dawn thu a sawi a, "Chhungkaw lam hawiin SEDP kan kalpui thei ta a ni," a ti.

MNF thuchhuah chuan, MNF President hian an party-ah chhung­kaw 21 a lâwm lut niin a tarlang.