Congress ṭhalaiin New Market an tlawh

Mizoram Pradesh Youth Congress Commi­ttee (MPYCC) hruaitute chuan September 3, Inrinni khan New Market an tlawh a, Chawhmeh Zuar Joint Association, New Market hnenah a ṭula hman atan tarpauline eng emaw zat an pe.

Congress ṭhalaite hian New Market ṭhiah a nih hnuah MNF sorkarin an sak leh mai loh avanga harsatna tâwkte an tlawh a; Chawhmeh Zuar Joint Association-te'n lo dawngsawngin, an harsatna tawhte an sawiho a ni.

MPYCC president Dr Lalmalsawma Nghaka chuan, bazarpui ṭhiah tak sakna tur sum Congress sorkarin an dah sa vek tawh tih sawiin, "Vawiina bazara eichawp leh thil dang zuarte harsatna tawhah hian mi tin kan tel vek a ni," a ti a, theihtawpa hma an lâkpui tur thu a sawi.

Bazarpui sakna tur sum awm sa reng kum li lai MNF sorkarin an up bet chu ṭha lo a tih thu sawiin Dr Lalmalsawma chuan, "MNF sorkar hian Bazarpui building hi lo sa thei teh reng pawh ni se, engtia rei nge an sak dawn tih hriat a ni lo. Bazarpui building rang taka sak a nih theih nan hian court hial thlen kan hreh lo a ni," a ti.

MPYCC President chuan, New Market ṭhiah a nih avangin chhungkaw 2,000 velin harsatna nasa tak an tâwk tih sawiin, "A bik takin chawhmeh zuar bazar nu ho hian tun dinhmunah hmunhma an neih loh avangin an inṭhut chhâwk lo thei lo," a ti a, a tam berah thla khatah ni 12 vel bâk an ṭhu thei lo niin a sawi.

Congress party chuan rim tak leh taima taka eizawnnaa thawkte an ngaisang tih sawiin Lalmalsawma chuan, "An din chhuahna tur kan thupui ber a ni. Ruahthimpui leh ni sen sa hnuaiah pawh rim taka eizawn nana ṭang taka thawk ṭâng ṭângte kan ngai pawimawh," a ti.

MPYCC tarlan danin, New Market in pui ber sak ṭhat hna kal mek hi Aizawl City Centre Annexe tih a ni a, in satu chu Lushai Engineers niin, sakna atana sum ruahman cheng nuai 3,641.59 chu K Deposit-ah dah mek a ni. October 4, 2018-ah kut thlak ṭan niin, thla 36 (kum thum) chhunga sak zawh tura tih a ni a, chutih laiin, hna thawh tur zinga 35% chauh thawh a la ni.