ZPM councillor-te hnathawh enfiah
ZPM hruaitute chuan kar kal ta khan Aizawl Municipal Corporation-a ZPM councillor-te'n an biala hna an thawh hrang hrangte a hmunah an enfiah a, September 2, Zirtawpni khan Ward-VIII ah khàrna hun an hmang.
Khârna inkhawmah ZPM president Lalliansawta chuan, "Aizawl khawpuiin state dangte anga municipal inrêlbàwlna changtlung tak kan la nei lo chungin, veng mawng ber thlenga ZPM councillor-te hnathawh chhuanawm tak tak mipuite'n ṭangkai taka an hmang tih mit ngeia ka hmu hi ka lawm hle a ni," a ti.
ZPM working president K Sapdanga pawhin thu sawiin, "A pawimawh ber chu hna thawh ṭhat a ni. Mi ṭhahnemngaite kan party leh ward mipuite'n councillor atana kan lo thlang hi kan ti fuh tak zet a, ward chhung mipui pawh an councillor-te chungah an lawmin kan hria," a ti a; an councillor-te chungah ZPM party an lawm thu a sawi.
K Sapdanga chuan, mipuiin Mizoram awm dan an vei tlang a, ram vei vanga political party-a awm kher ṭul ti lo pawh an tam tih sawiin, "Hei aia ram ṭha zawk, hmasawn zawk, khawpui chên nuam zawk tam tak a la awm ngei ang. Hengte hi mipui hian kan phú a, rorelna ber dik se kan chanvo a ni thei vek. Duh thlanna dik hmang ngam tura huaisen a ṭul," a ti.
ZPM Working President chuan, hun kal tawh leh kal mekte chu indem buai nan hmang lo a, hmabak atana zirtirtuah hmang tura chahin, "Hnam ding chhuak ni tura thâ nei tawh lo ang hiala zirtirna te, ram roreltu ni tura sum tam tak séng tura inzirtirnate hi inbumna a ni," a ti a; sum leh pái ruihchilhna ruamah Mizoram a luh loh nan ṭan la turin mipui a sáwm.
ZPM Municipalites Department leh Publicity Department ten a thawh khatna atan kumin August 24 aṭanga Sept. 3 inkar khan ZPM councillor-te'n an sum hmuh hmanga an ward ṭheuha hmasawnna hna an thawhte an en kual a ni. Councillor-te hnathawh chu ṭha an ti a, "An fund-te ṭangkai takin an hmang a; pawl, welfare leh veng hrang hranga party hruaitute'n hlâwkna beisei loin, thâ leh zung, sum leh pai insengso zawkin councillor-te an thawhpui tih a takin kan hmu a ni," an ti.