Hripui vei mek zat a tlahniam hret hret

Nimin tlai khan Covid-19 hripui vei enkawl lai mi 390 chiah an awm a, hripui vei mek zat a tlahniam hret hret.

Mizoramah Covid-19 vei September 2, Zirtawpni khan mi 64 leh September 3, Inrinni khan mi 49 hmuh chhuah a ni. Nimin leh Inrinni khan hripui vei dam tawh mi 187 chhuahtir an ni a, Covid-19 vanga thi an awm belh lo.

September 2-a Covid-19 positive hmuh chhuah mi 64-te chu mipa leh hmeichhia 32 ve ve an ni a, rapid antigen test hmanga hmuh chhuah vek an ni. Swab sample endik zat 333 aṭanga positivity rate chu 19.22% a tling.

Inrinnia hripui vei hmuh tharte chu mipa 26 leh hmeichhia 23 an ni a, rapid antigen test hmanga hmuh chhuah vek an ni. Swab sample endik zat 309 aṭanga positivity rate chu 15.86% a ni.

Nimin khan hripui vei dam tawh mi 65 chhuahtir an ni a, September 3, Inrinni khan mi 122 chhuahtir an ni bawk.

IDSP record angin, Mizoramah Covid-19 vei 2,37,373 hmuh chhuah a ni tawh a, mipa 1,10,555 leh hmeichhia 1,26,818 an ni a, mipa aiin hmeichhia 16,263-in an tam zawk. Nimin tlai dar 5 thleng khan mi 2,36,261 (99.53%) chhuahtir an ni tawh a, mi 722 (0.30%) thi tawhin, enkawl mek mi 390 (0.17%) an awm.

Kum 2011 chhiarpui angin, Covid-19 vei hmuh tawh 2,37,373 chu state mipui zat aṭangin 21.63% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.