KHAWTHLIR
Thisen pe
September 3, Inrinni khan ṬKP, Republic Vengthlang Bial chuan Civil Hospital, Aizawlah thisen unit 105 an pe a, petute mipa 83 leh hmeichhia 22 an ni. KṬP, Tuikual North Branch-in an kohhran hall-ah Synod Hospital tan thisen unit 34 an pe a, petute mipa 27 leh hmeichhia pasarih an ni a; KṬP, Chhiahtlang Bial member mipa 32 leh hmeichhia pangate pawhin Serchhip District Hospital tan thisen unit 37 an pe. SAY, Central South Division-in Tachhipah ZMC tan thisen unit 30 an pe a, petute mipa 23 leh hmeichhia pasarih an ni.
Cabin kamchhuak
V Kungtea (Rairahtea), Saizawh West lehkhabu ziah ‘Cabin kamchhuak’ tih chu September 3, Inrinni khan minister of state Lalruatkima'n Synod Conference Centre-ah a tlangzarh. Minister chuan, V Kungtea chu vohbik a ni tih sawiin, "Vohbik ni chunga hetiang lehkhabu a chhuah thei hian ngaihtuahna a tikal thui a, mi dangte tan chona nasa tak a pe a, Pathian hian a vohbik tih a tichiang hle a ni," a ti.
Zawh thei chin bituk
Mamit SP Vineet Kumar chuan KDZKT leh Bairabi-Zamuang inkar kawngpuiah lirthei metric ton 19 aia rit tlân phal a nih loh thu a puang a; NH-44A, Darlak lei chu lirthei metric ton 15 aia rit tan zawh khap a nih thu a tarlang bawk.
JEE-ah 78-na
Angeline Lalpekhlui d/o Dr Rohmingliana, Mission Vengthlang chu Joint Entrance Exam (JEE) 2022-ah India ram pumah 78-na a ni a, scheduled tribe zingah pakhatna a ni. Angeline Lalpekhlui hi kum 2019 khan HSLC Examination-ah pahnihna a lo ni tawh bawk.
Mi bo zawng
September 3, Inrinni chawhnu dar 2 vel khan Lalruatpuia (19), Leite, Hnahthial district chu Mat luiah a tla hlum nia hriat a ni a, zawn mek a ni. Leite aṭanga thu dawn danin, Lalruatpuia hi a ṭhiante paruk nen Mat luiah an kal a, Lalruatpuia hi nghakuai chiahin a kal hrang a, a chin hriat lohin a bo zui a ni. Nimin lam khan Leite bâkah Hnahthial leh a chhehvela khaw hrang hranga mite'n an zawng a, nimin tlai thleng khan hmuh a la ni lo.
Lalkulha vui liam
Inchai chak Vanlalkulha (78), Zemabawk North chu September 3, Inrinni chawhnu dar 2:25 khan a thi. Mizo inchai champion ṭhin Lalkulha hi hun eng emaw chen damdawi-inah enkawl a nih hnuah Inrinni tlai khan Trinity Hospital ICU-ah a thi a, nimin khan vui a ni. (Kimchang zawkin sport-ah)