Police-in August 2022 chhungin nuai 4,600 hû ruihhlo an man

Mizoram Police chuan kumin August thla chhung khan ruihhlo chi hrang hrang cheng nuai 4,600 chuang hû leh Myanmar aṭanga dan loa lak luh kuhva rah ip 749 an man.

Police tarlan danin, August 2-30, 2022 inkarah khan Mizoram hmun hrang hrangah heroin kg 5.20, methamphetamine mûm 1,50,100, pseudoephedrine mûm 10,000, Burma zu (BEDC) fûn 59 (litre 43), sapzu úm 420 leh beer bûr 240 an man a; ruihhlo an man zawng zawng hlutna chu Rs 46,72,22,000 a tling. Ruihhlo an man zinga a tam zawk chu Champhai district-a man a ni.

Ruihhlo man kaihhnawihah mi 20 man an ni a, chu'ng zinga panga chu Myanmar lam mi niin, Punjab leh Tripura mi pakhat ve ve an tel a, a bak zawng chu Mizo an ni.

August 2022 chhung vêk khan Mizoram police-te chuan Myanmar aṭanga dan loa lak luh kuhva rah ip 749 an man a, kuhva rah phurhna lirthei 16 leh mi 18 an man bawk.