Union minister Smriti Irani Mizoramah a rawn zin

Ministry of Women & Child Development leh Ministry of Minority Affairs enkawltu minister Smriti Zubin Irani chu zan khat riakin Mizoramah a rawn zin a, Chief Minister leh sorkar hotute a kâwm bakah, hmun ṭhenkhat a tlawh.

Smriti Zubin Irani hian September 3, Inrinni khan Aizawl a rawn thleng a, chief minister Zo­ramthanga chu CM Bang­laah a kâwm nghal a ni.

CM Zoramthanga chuan, state dang ṭhen­khat nen khaikhinin economy hmasawnna kawng zawhnaah Mizo­ramin bul a ṭan har avangin hmun dangte nen ang khata khaikhin a theih vek loh tih a sawi a, "State economy-in hma a sawn zel theih nan theihtawp chhuah a ni," a ti.

Inrinni vêk khan Smriti Irani chuan Lunglei tlawhin, DC conference hall-ah Lunglei district-a sorkar hotute a kâwm a, sorkar laipui scheme kalpui mek dinhmun leh hmachhawpte a sawipui.

Smriti Zubin Irani chuan, district hma­sawnna chu head of office-te kutah thui tak a innghat tih sawiin, "In hmazawn ṭheuha hna leh tih tur awmte uluk leh taima takin thawk u la, in hna thawh danah district mipui hmasawnna leh hamṭhatna dah pawimawh hmasa ṭhin ang che u," a ti.

Mipuiin sorkara an harsatna thlen theih­na tur public grie­vance cell din ngai pawimawh tura chahin Union Minister chuan, "Tar leh pianphunga rualbanlote tan camp te, kut hnathawktute tan ṭangkai zawka scheme ṭhenkhat thlun zawm (convergence)-te ngaih pawimawh a ṭul," a ti a; hna an thawhnaah harsatna leh mamawh an neih chuan ṭanpui turin sorkar laipui a inpeih reng thu a sawi.

Inkawmhonaah hian Lunglei DC Kulothungan A-in Lunglei district dinhmun tlangpui leh sorkar hmalakna langsar zualte a sawi a; sorkar laipui scheme kaltlanga department hrang hrang hmalaknate sawiho a ni.

Smriti Irani hi District Council & Minority Affairs secretary Dr Lalrozama leh Social Welfare & Tribal Affairs director Lallianpuii ten an ṭawiawm. Smriti Zubin Irani hian nimin chawhnu khan Mizoram a chhuahsan a ni.